Partia Demokratike, ka dorëzuar këtë të enjte në Kuvend kërkesën për ngritjen e Komisioni Hetimor për zgjedhjet e 25 Prillit.
Në një prononcim për gazetarët, Enkelejd Alibeaj tha se “kemi dorëzuar këtë kërkesë si një nevojë jo vetëm e aksionit politik të anonçuar tashmë nga PD, po më tepër se kaq, si një nevojë ulëritëse që sistemi demokratik, demokracia në këtë vend kërkon”.
Deputeti demokrat tha se disa prej çështjeve që duhen hetuar janë “mbyllja e kufijve për emigrantëve, për të bërë të pamundur votimin e tyre. Mos bërja asgjë për procesin e legalizimit për 10 mijë objekte. Disbursimi i parakohshëm i ndihmës ekonomike. 4 vite u zhvatën, u vodhën, u varfëruan, ndërsa në periudhë zgjedhore 2.5 milionë euro ndihmë ekonomike, duke rifutur familjet në këmbim të votës. Punësimi i së paku 13 mijë shqiptarëve me kontrata të përkohshme, në periudhën e fushatës zgjedhore dhe ‘qershia mbi tortë’, spiunazhi modern, 910 mijë shqiptarë të spiunuar prej procesit famëkeq të patronazhistëve“.
