Aktivistja Evi Kokalari, e cila është e angazhuar pranë Partisë Republikane në SHBA, si pjesë e diasporës shqiptare në Amerikë, u shpreh gjatë “Foltores” në Durrës, se Lulzim Basha përjashtoi Sali Berishën nga Grupi Parlamentar, për të mbyllur dosjen e tij në SHBA.
Kokalari tha se diaspora është e interesuar për zhvillimet në vend. Kokalari bëri një denoncim të fortë.
“Zoti Berisha është përjashtuar nga grupi parlamentar i Partisë Demokratike pasi këmbeu mbylljen e dosjes së korrupsionit të Lulzim Bashës, një dosje që ekziston në Shqipëri dhe në Amerikë.
Kjo është e vetmja arsye pse është përjashtuar Sali Berisha,” tha ajo, duke shpjeguar se bëhet fjalë për një dosje lobimi në SHBA.
Kokalari tha se Lulzim Basha prej 3 vjetësh nuk merrte vizë amerikane dhe ne do të monitorojmë nëse ai do të pajiset me vizë tashmë, dhe nëse kjo ndodh, ne do ia çojmë çështjen Kongresit amerikan.
“Basha pati një problem me fondet që u paguan për ti siguruar një takim. Nga deklarimet dhe nga dokumentet e dosjes doli se një pjesë e fondeve ishin ruse, pra kjo është e vërteta. Lulzim Basha nuk u lejua të futet në SHBA, ndërsa tani ne do të monitorojmë nëse ai do të pajiset ose jo me vizë”, tha Kokalari.
Lidhur me diskutimet online nëse ajo do bëhet kryetare e PD, Kokalari tha: ‘Unë nuk kam nevojë të bëhem kryetare e Partisë Demokratike pasi ne e kemi kryetarin e Partisë Demokratike, ai është Sali Berisha’.
