Rreth 60.4 milionë gjermanë do të votojnë sot për Bundestagun e 20 -të, dhoma e ulët e parlamentit të Gjermanisë. Më shumë se 31 milion votues janë gra dhe rreth 29 milion burra.
Në zgjedhje marrin pjesë 53 nga 87 partitë politike, që kërkuan lejen e autoriteteve për të marrë pjesë në proces.
Por referuar sondazheve, vetëm 7 prej tyre pritet të marrin 5% të kërkuar për t´u përfaqësuar në Bundestag, me të Majtën (Die Linke), ndoshta partinë më të diskredituar në Gjermani pas Afd (Alternativa për Gjermaninë) e ekstremit të djathtë që lufton për të dërguar përfaqësues në dhomën e ulët gjermane.
Rezultatet e përkohshme të zgjedhjeve do të shpallen pas orës 18:00 pasdite. Ato do të llogariten bazuar në të dhënat e sondazheve të daljes së përkohshme. Numërimi i votave do të vazhdojë deri në orët e para të së hënës.
Kancelarja Angela Merkel i kërkoi gjermanëve votën e tyre për të mbështetur pasardhësin e saj Armin Laschet në një përpjekje të fundit përpara shkuarjes në kutitë e votimit këtë të dielë.
Në garën për kancelar përballë 60 vjeçarit Laschet, është Social Demokrati Olaf Scholz. Sondazhet më të fundit tregojnë se ata janë ngushtësisht afër njëri tjetrit me mbështetje, duke i kthyer këto zgjedhje si më të paparashikueshmet vitet e fundit.
Socialdemokratët dhe konservatorët janë thuajse me mbështetje të barabartë, me 1 përqind diferencë (26/25%).
Gjermania voton me sistem proporcional, të personalizuar. Kjo do të thotë se çdo votues në Gjermani ka dy vota, të ashtuquajturat vota e parë dhe vota e dytë.
Me votën e parë, votuesi zgjedh një kandidat të caktuar, në njërën prej 299 zonave zgjedhore. Kjo garanton që në parlament të përfaqësohet çdo zonë elektorale, çdo rajon. Me votën e dytë, votuesi voton për listën kombëtare të një partie. Është vota e dytë që vendos për fuqinë me të cilën përfaqësohet një parti në Bundestag.
