Kryeministri Edi Rama e konsideroi shpalljen e ish-kryeministrit Sali Berisha “non grata” nga SHBA si një vazhdimësi të fazës së re në të cilën ka hyrë Shqipëria, për të cilën tha se “nuk ka më monumente të parrëzueshme të korrupsionit”.
Reagimi i Ramës u bë gjatë një interviste për Zërin e Amerikës, ku ai foli për marrëdhëneit me Kosovën, vizitën e tij në SHBA, mandatin e tretë qeverisës apo pritshmëritë në marrëdhëniet me opozitën.
“Flet vetë Sekretari i Shtetit Amerikan (Antony Blinken) në këtë rast dhe mendoj se çdo prononcim në këtë drejtim do të politizonte edhe më shumë një fakt që nuk ka nevojë për koment, një fakt që është në sytë e gjithë shqiptarëve, një fakt që tregon se prej vitesh e vitesh Shqipëria ka hyrë në një fazë të re që nuk ka më asnjë monument të parrëzueshëm të së shkuarës së korrupsionit dhe pengimit të demokracisë”, tha Rama, i pyetur se përse ka zgjedhur të heshtë për këtë çështje.
