“Nuk do të ketë asnjë mbledhje të Kuvendit Kombëtar dhe çdo forumi tjetër të kësaj partie, lidhur me vendimin për përjashtimin e Sali Berishës nga Grupi Parlamentar i PD”, mësohet të jetë shprehur kreu demokrat Lulzim Basha, gjatë mbledhjes së Kryesisë së PD, ku ai pati përplasje me deputetin Flamur Noka.
Burime nga PD shprehen se kreu demokrat u tregua i prerë në qëndrimin e tij për të mos lejuar thirrjen e Kuvendit Kombëtar, edhe pse nga ish-Kryeministri Sali Berisha është paralajmëruar mbledhja e firmave nga anëtarësia e PD, të cilat do t´i paraqiten Këshillit Kombëtar në formën e një kërkese për mbledhjen e Kuvendit të Jashtëzakonshëm të PD-së.
Berisha tha se për të thirrur Kuvendin Kombëtar mjaftojnë rreth 1500 firma, ose 15 % e anëtarësisë së kësaj partie me të drejtë vote.
Por në mbledhjen e sotme të Kryesisë, Basha u shpreh se nuk do të lejojë që në strukturat e PD të krijohen grupime, qofshin këto edhe deputetë, që dalin kundër SHBA.
Duke argumentuar se vendimi për përjashtimin e Berishës nga Grupi Parlamentar ishte një kërkesë e panegociueshme e SHBA, Basha mësohet të jetë shprehur se ai nuk do të lejojë që të preken raportet e kësaj partie me partnerin strategjik, sikundër ai konsideron Shtetet e Bashkuara.
“Kërkesa për z.Berisha nuk ka ardhur nga zyrtarë të nivelit të tretë apo të rangut të ulët. Ka ardhur nga kupola e shtetit amerikan. Informacionet i di unë, sikundër i di shume mirë edhe doktori, dhe që ju s’keni për t’i marr vesh kurrë”, mësohet të jetë shprehur Basha.
Tashmë nuk dihet se çfarë rrjedhe mund të marrin zhvillimet në Partinë Demokratike dhe me cilat mekanizma Basha mund të pengojë mbledhjen e Këshillit Kombëtar apo Kuvendit të Jashtëzakonshëm Kombëtar të PD, nëse nga Berisha do të mblidhen firmat e 15 % të anëtarëve me të drejtë vote.
Gjatë ditës së martë, ish-Kryeministri Berisha do të zhvillojë takimin e rradhës në Fier, nga ku pritet të akuzojë sërisht kreun e PD, sikundër bëri në nisje të asaj që lideri historik i demokratëve e quan “Foltorja”.
