Kapet me 22 kg dro*ë, 1 i arrestuar në Tiranë

Rreth 22 kg drogë janë sekuestruar në Tiranë, në kuadër të aksionit të koduar “Camel”, që ka çuar në arrestimin e një personi dhe shpalljen në kërkim të një tjetri.

Burime zyrtare nga policia konfirmuan këtë të Martë se në pranga u vu Florian Meti (Martaneshi), 37 vjeç, i dënuar më parë për veprën penale “Armëmbajtja pa leje”.  Po ashtu, u shpall në kërkim bashkëpunëtori i tij – V.M., 34 vjeç.

“Gjatë kontrollit të banesave dhe ambienteve të ndryshme, në një banesë ku ndodhej dhe 37-vjeçari (i arrestuar në flagrancë), shërbimet e Policisë gjetën dhe sekuestruan 84 pako, me peshë 21 kg e 35 gram lëndë të dyshuar narkotike kanabis në formë çokollate”, njoftoi policia.

LEXO EDHE  Hapja e shkollave, Tomini: Do rriten rastet me Covid, mësuesit duhet të tregojnë çertifikatën

Aksioni nga sektori për Hetimin e Narkotikëve në DVP Tiranë erdhi mbi bazën e informacioneve të marra në rrugë operative për shpërndarjen e lëndëve narkotike kanabis e përpunuar në formë çokollate, shtuan të njëjtat burime.