Kreu demokrat Lulzim Basha ka thirrur sot në një takim kryetarët e degëve, të cilët i ka njohur me vendimin e tij për të përjashtuar nga grupi parlamentar ish-Kryeministrin Sali Berisha.
Pa dhënë shumë detaje lidhur me vendimin, Basha ka marrë mbi supe gjithë përgjegjësinë, duke u shprehur se nuk ka hedhur për diskutim në Kryesi apo në Grupin Parlamentar njv vendim të tillë, pasi mund të krijoheshin përplasje dhe përçarje.
Burime nga mbledhja bëjnë me dije se kreu demokrat ka kërkuar nga drejtuesit e degëve që të mos përfshihen në debatin e nisur prej disa ditësh në PD, edhe pse nga disa prej drejtuesve iu kërkua nisja e një turi në bazën e partisë për të sqaruar anëtarësinë.
“Qëndroni larg debateve, nuk ka nevojë për t´u angazhuar”, mësohet të ketë qenë porosia e prerë e kreut demokrat, i cili prej disa ditësh ndodhet nën akuzat e ish-Kryeministrit dhe liderit historik të PD, Sali Berisha, pas vendimit të Bashës për përjashtimin e tij nga Grupi Parlamentar.
Berisha e ka cilësuar vendimin si anti-statutor dhe mbrëmjen e djeshme tha se do të merrte pjesë në mbledhjet e grupit kur ti tekej, pasi askush nuk mund t´a ndalonte.
Dy ditë më parë, Lulzim Basha përjashtoi Sali Berishën nga grupi parlamentar i Partisë Demokratike përkohësisht, për shkak se DASH e ka shpallur non-grata. Basha mësohet se ka thënë se nuk kishte rrugëzgjidhje tjetër, pasi kjo ishte kërkesë e amerikanëve.
Berisha ka paralajmëruar deri në mbajtjen e një referendumi për zgjedhjen e një kryetari të ri, duke rrezikuar serjozisht për herë të parë postin e Bashës, që kur e mori 8 vite më parë.
