Edi Paloka, deputet i PD dhe kryetari i Këshillit Kombëtar të Partisë Demokratikë, është parë këtë të Premte në një kafene pranë banesës së ish-kryeministrit Sali Berisha, në kryeqytet.
Ndërkohë, këtë të Premte, kryetari i PD Lulzim Basha ka thirrura dhe një mbledhje të grupit parlamentar demokrat.
Pasditen e djeshme, kryetari Basha njoftoi vendimin për përjashtimin e liderit historik të demokratëve Sali Berishës, nga grupi parlamentar demokrat. Vendimi, tha Basha, do të jetë në fuqi “deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje (shpalljen non grata nga ‘DASH’) në rrugë gjyqësore”.
Vetë Berisha e cilësoi vendimin një gabim fatal të Bashës dhe tha se ai erdhi pas presioneve të mëdha që ka marrë kreu i PD, duke u kërcënuar me sanksione.
Berisha u shpreh se me këtë vendin, Basha “dorëzoi sovranitetin e PD” dhe partia u kthye në një satelit të Edi Ramës. Ai u zotua se do të bëjë gjithçka për kthimin e sovranitetin të Partisë Demokratike.
Për seancën e sotme, që shënon nisjen e sesionit të ri parlamentar, Berisha u shpreh mbrëmjen e djeshme se do të jetë në Kuvend.
Në Partinë Demokratike ndërkohë, kanë qenë të ndarë për vendimin e kryetarit Lulzim Basha. Në mbledhjen e grupit parlamentar, ky i fundit ka thënë se vendimi ishte i tiji personal dhe askush tjetër nuk ka përgjegjësi.
