Ish-kryeministri Sali Berisha është pritur nga mbështetës këtë të Premte para parlamentit, që shënoi dhe nisjen e sesionit të ri plenar.
Berisha, i cili një ditë më parë u përjashtua nga grupi parlamentar i PD nga kryetari Lulzim Basha, tha se pas vendimit fshihen pazare Rama-Basha.
Ai paralajmëroi se “do marrë çdo nismë ligjore statutore brenda partisë për rikthimin në piedestalin që meriton”.
Pasditen e djeshme, kryetari i PD Basha njoftoi vendimin për përjashtimin e liderit historik të demokratëve-Sali Berishës, nga grupi parlamentar demokrat. Vendimi, tha Basha, do të jetë në fuqi “deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje (shpalljen non grata nga ‘DASH’) në rrugë gjyqësore”.
