Ish-ministri i Drejtësisë, Ylli Manjani është shprehur kundër vendimit të kryetarit të PD, Lulzim Basha, i cili përjashtoi Sali Berishën nga grupi parlamentar demokrat.
Manjani i kujton kryetarit të PD-së se “në zgjedhje të votojnë shqiptarët, jo ambasadorët, e as kundërshtarët politikë”.
Në një reagim në rrjetet sociale, Manjani shkruan:
Vendimin e jetës ky e harxhoi për të përzënë Berishën nga partia, dmth nga asgjëja.
Dhe ne prisnim që ky të kishte vendimin e jetës së tij largimin e Ramës dhe ardhjen e vet në pushtet, dmth tek vetë gjëja.
Zhgënjim…
****
Lulzim Basha, që harxhoi vendimin e jetës së Tij politike, me një njeri të vetlarguar nga partia që prej 8 vitesh, nuk ka më as jë shanc të bindë njeri t’i shkojë nga prapa.
Sot kanë përfundimisht të drejtë të gjithë ata që na thoshin se Luli nuk bën për këtë punë. Luli ka humbur tashmë mbështetje të një shumice të madhe votuesish që duan ndryshim.
Sinqerisht, unë vetë sot mendoj se është më mirë Rama aty ku është sesa të mbaj shpresë tek Luli, që krijon debat me partinë e vet për një të vetlarguar në fund të fundit… Vaj hallin ç’mund të bëjë ky ndaj atyre që duan të zhvillohen në karrierë..!
****
Uroj që të marrë sa më parë edhe vendimin e dytë të jetës së Tij: të dorëhiqet paqsisht. Ai nuk drejton dot më atë parti. Ai nuk është në harmoni llogjike, politike e shpirtërore me atë parti.
Mbi të gjitha, Basha ka dhënë qartësisht idenë se është i shantazhueshëm. Ky është fundi. Ata që e mbajnë nën shantazh nuk e falin. Herët a vonë do ta këpusin. Por deri atëhere do ketë bërë më shumë dëm sesa të mira.
Gjykoj se alternativa që mbetet është: o ikën Luli, o ikën PD nga jeta politike. (Largimi i PD ishte edhe qëllimi i gjithë superpropagandës së superpushtetit, të paktën i 2 viteve të fundit.)
Nga ana tjetër, nuk është zgjidhje as rikthimi i Doktorit në krye të saj… Por doktori, nëse ka ndonjë gjë për të bërë duhet ta bëjë tani. Përndryshe ta dorëzojë edhe atë mandat e të largohet bashkë me PD.
*****
Në këtë pikë PD nuk mund të jetë më çështje vetëm e demokratëve.
PD duhet të synonte të forconte lidhjet me shqiptarët që e votojnë dhe jo me ambasadat që e shantazhojnë… Se në zgjedhje të votojnë shqiptarët, jo ambasadorët. As kundërshtarët politikë.
