Ish-kryeministri Sali Berisha ka paralajmëruar se “do jetë e afërt dita kur PD të rifitojë forcën, vendosmërinë, legjitimitetin, për të larguar një të lig sundues të bazuar mbi krimin, dhunimin e qytetarëve dhe pazaret e fëlliqura që e shndërrojnë PD në fasadë opozitë”.
“Do marr çdo nismë ligjore statutore brenda partisë për rikthimin në piedestalin që meriton”, theksoi ai.
Në një prononcim për gazetarët pas përfundimit të seancës së parë plenare që shënon dhe nisjen e sesionit të ri parlamentar, Berisha tha se vendimi i Bashës për ta përjashtuar nga grupi parlamentar i PD është nul.
Ai ripërsëriti se vendimi i Bashës është një pazar i pistët mes kryetarit të PD dhe kryeministrit Edi Rama.
Berisha tha se është “më i motivuar se kurrë në jetë për të mbrojtur interesin publik të qytetarëve, interesin kombëtar të kombit shqiptar, për të denoncuar të gjitha aferat e këtij regjimi të kaklistokracisë, regjim i cili ka zgjedhur me kurthe e pazare të eliminojë e opozitarët”.
Ashtu si në reagimin para hyrjes së seancën plenare, ai foli edhe njëherë për pazare Rama-Basha, që sipas ish-kryeministrit fshihen pas përjashtimit të tij nga grupi parlamentar demokrat. Berisha u shpreh se “ajo që ndodhi është një marrëveshje Rama-Basha në kurriz të zgjedhësve shqiptare dhe duhet çmontuar një minutë e më parë”.
“PD është parti e lirive e të drejtave njerëzore, e kushtetutshmërisë e interesit kombëtar. Jam i bindur se demokratët me dinjitet e vendosmëri do dijnë të vendosin PD në piedestalin… Do marr çdo nismë ligjore, statutore brenda partisë për rikthimin në piedestalin që meriton”, vijoi.
“Siç e shini unë jam anëtar i grupit parlamentar të PD, vendimi, kompromisi Basha-Rama është “nul and void”, s’ka mbështetje ligjore përveç fëlliqësisë morale të pazareve. Në çdo kohë do hyj në seli dhe do jetë e afërt dita kur PD të rifitojë forcën, vendosmërinë legjitimitetit për të shporrur një të lig sundues të bazuar mbi krimin dhunimin e qytetarëve dhe pazaret e fëlliqura të atyre që e shndërrojnë PD në fasadë opozitë”, tha ai.
Berisha u prit në Kuvend dhe u largua prej aty i shoqëruar nga deputetët e PD, Edi Paloja, Tritan Shehu dhe Flamur Noka.
Pasditen e djeshme, kryetari i PD Basha njoftoi vendimin për përjashtimin e liderit historik të demokratëve-Sali Berishës, nga grupi parlamentar demokrat. Vendimi, tha Basha, do të jetë në fuqi “deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje (shpalljen non grata nga ‘DASH’) në rrugë gjyqësore”.
DENONCO