Basha në selinë e PD, shmang komentet për Berishën

Kryetari i Partisë Demokratike, Lulzim Basha ka hyrë në selinë e PD, ku para nisjes së sesionit të ri parlamentar do të mbahet një mbledhje e grupit parlamentar.

Basha ka shmangur gazetarët, duke mos dhënë asnjë prononcim pavarësisht pyetjeve lidhur me vendimin për Berishën.

Pasditen e djeshme, kryetari Basha njoftoi vendimin për përjashtimin e liderit historik të demokratëve Sali Berishës, nga grupi parlamentar demokrat. Vendimi, tha Basha, do të jetë në fuqi “deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje (shpalljen non grata nga ‘DASH’) në rrugë gjyqësore”.

Vetë Berisha e cilësoi vendimin një gabim fatal të Bashës dhe tha se ai erdhi pas presioneve të mëdha që ka marrë kreu i PD, duke u kërcënuar me sanksione.

LEXO EDHE  A ju kanë thirrur amerikanët për çështjen e Berishës? Bardhi: Disa deputetë të PD-së janë kontaktuar nga ambasada

Berisha u shpreh se me këtë vendin, Basha “dorëzoi sovranitetin e PD” dhe partia u kthye në një satelit të Edi Ramës. Ai u zotua se do të bëjë gjithçka për kthimin e sovranitetin të Partisë Demokratike.

Për seancën e sotme, Berisha u shpreh mbrëmjen e djeshme se do të jetë në Kuvend.

Në Partinë Demokratike ndërkohë, kanë qenë të ndarë për vendimin e kryetarit Lulzim Basha. Në mbledhjen e grupit parlamentar, ky i fundit ka thënë se vendimi ishte i tiji personal dhe askush tjetër nuk ka përgjegjësi.