Aktivisti nga Tetova, Arjanit Xhaferri, në studion e Syri TV, foli për ngjarjen e rëndë të ndodhur në Spitalin e COVID-19, ku prej zjarrit të rënë kanë humbur jetën 14 persona.
“Ka patur shqetësime mbi standardet e ndërtimit të këtyre spitaleve ku po trajtohen të sëmurët me COVID. Edhe më herët kanë qarkulluar në media lajme se objekti nuk i plotëson standardet për një trajtim të tillë”, thotë fillimisht Xhaferri, i cili më tej shton: “Problemi këtu është që inspektimet nuk dihet nga kush janë bërë.
Në rrjetet sociale janë parë fotografi të postuara nga drejtori ekonomik i spitalit që thotë se ka bërë inspektimet. Nuk dihet nëse drejtori ekonomik i spitalit ka certifikatën e duhur për të inspektuar instalimet elektrike që mund të kenë krijuar shpërthimin”, u shpreh Xhaferri.
Deri tani janë konfirmuar 14 persona që kanë humbur jetën, por aktivisti Xhaferri deklaron se ky numër është më i madh.
“Ky shpërthim ka marrë jetën 14 personave, por nga bisedimet që kam patur sot me efektivë të njësive kundër zjarrit në Tetovë ata deklarojnë se janë nxjerrë nga dhomat e djegura më shumë se 24 persona. Pra, numri i viktimave mund të jetë më i madh se kaq (14)”, deklaroi aktivisti nga Tetova, Arjanit Xhaferri.