Ish deputeti dhe ish ministri socialist, Kastriot Islami ka komentuar largimin e Gramoz Ruçit nga politika.
Gjatë intervistës në studion e lajmeve në RTV Ora, Islami tha se Gramoz Ruçi ka bërë marrëveshje me Edi Ramën për largimin nga politika para zgjedhjeve të 25 prillit.
Gazetarja: Flitet se ka një listë të ambasadës amerikane, një listë emrash, të cilëve u është kërkuar të japin dorëheqjen, të largohen nga Partia Socialiste, apo të lënë mandatin. Prej disa javësh ka largime të çuditshme nga politika?
Islami:Gramoz Ruçi nuk duhet ngatërruar (me listën e ambasadës amerikane), sepse nuk ka lidhje me këtë. Gramoz Ruçi u largua direkt pas zgjedhjeve dhe kam përshtypjen që Gramoz Ruçi kishte një marrëveshje me Edi Ramën, që do largohej që para këtyre zgjedhjeve. Që në mandatin kur është bërë kryetar parlamenti ka rënë dakord që do të jap këtë post të rëndësishëm dhe më pas të largohet. Sigurisht, në këtë radhë duke qenë se u vështirësua fitimi i këtij mandati dhe Edi Rama kërkonte mandat të tretë, i është lutur që rri dhe ca kohë dhe pas zgjedhjeve vendosim se çfarë do bësh.
Ish-deputeti shton se pas zgjedhjeve Ruçi ka thënë se nuk ka më se çfarë të bëj për partinë, duke ditur se nuk bëhet dot president, ai është larguar.
Islami:Pas zgjedhjeve u fitua mandati, Gramozi ka thënë ‘unë s’kam çfarë bëj më, unë e arrita maksimumin si kryetar parlamenti, ku të rrijë më unë këtu?” Gramozi e mori maksimumin, president nuk bëhej dhe Rama e ka pranuar që Gramozi të largohej. Gramoz Rucci dha dorëheqjen nga politika më 12 qershor të këtij viti. Ai e bëri të ditur lajmin e largimit në ditën e Kongresit të 30-vjetorit të krijimit të Partisë Socialiste.
