Eksperti i shëndetit publik, Erion Dasho, përmes rrjeteve sociale, i ka drejtuar një apel qytetarëve që të vaksinohen kundër Covid-19.
“O shqiptarë, mjaft me teori konspirative! Vaksinohuni dhe mos merrni në qafë veten dhe të tjerët! Sa më parë, aq më mirë!”, shkruan Dasho.
Postimi nga Erion Dasho
SHKENCËTARË DHE “KOMPETENTË”
Sot me qëllim vendosa një status ku nuk jepja asnjë argument shkencor. Jepja shembullin e Izraelit që ka vaksinuar 90% të popullsisë me vaksina me bazë ARN-je. Kur një popull që ka nxjerrë dhe vazhdon të nxjerrë disa nga mendjet më të ndritura të njerëzimit, vaksinon 90% të popullatës, a kanë luksin ta gjykojnë popuj që kanë pjesën më të madhe të popullatës analfabetë funksionalë?!
Nuk i dhimbsen izraelitët qeverisë së tyre? Mos nuk janë izraelite disa prej kompanive më të famshme në botë të inteligjencës që mund të kenë aftësi zbuluese pak më të lartë se shqiptari që harxhon 10 orë në ditë në kafe dhe hera e fundit që ka hapur një libër shkencor është klasa e tetë e fillores?!
Por jo!!! Në status më kundërshtuan me dhjetëra persona të cilët më jepnin argumente nga më të stërholluarit. Këta njerëz që para një viti nuk dinin ç’është antitrupi, limfociti, ADN-ja dhe ARN-ja, papritur janë bërë ekspertë dhe diskutojnë teoritë e profesorëve të Oksfordit!!!
O shqiptarë!
Mjaft me teori konspirative!
Vaksinohuni dhe mos merrni në qafë veten dhe të tjerët!
Sa më parë, aq më mirë!
