Kryeministri Edi Rama në jo pak raste në vitet e fundit ka tërhequr vëmendjen lidhur me deklaratat e tij lidhur me Bashkimin Europian.
Pavarësisht se ka festuar disa herë hapjen e negociatave, Rama ka arshivuar vetëm dështime, pasi prej 2013-ës, kohë kur u ul në karrigen e Kryeministrit të Shqipërisë, nuk ka mundur të çojë përpara procesin, ndërsa nga 3 kushte, Shqipërisë iu vendosën 15 të tilla, që kishin të bënin me zgjedhjet e lira, luftën ndaj krimit, drogës dhe korrupsionit.
Por duket se Rama nuk ka hequr dorë nga gjuha paralajmëruese, deri kërcënuese, ndërsa në forumin që po zhvillohet në Slloveni, për Integrimin e Ballkanit Perëndimor në Bashkimin Europian, kreu i qeverisë shqiptare tha se nuk ka të ardhme të Europës pa vendet e Ballkanit Perëndimor. Rama kërkoi të hiqet dorë nga shprehje se negociatat u bllokuan nga faktorë të tretë.
“Ne jemi këtu për të luftuar. Ne nuk po kërkojmë licencë për të qenë europianë. Ne jemi europianë çfarëdo të mendojnë njerëzit e BE. Ne jemi europianë dhe sinqerisht i jam mirënjohës kryeministrit se në këtë diskutim për të ardhmen e Europës, ne u ftuam. Natyrisht është një takim anësor. Është shumë dramatike dhe qesharake të shohësh BE të angazhohet në diskutime për të ardhmen e Europës dhe ne nuk ftohemi”, u shpreh Rama.
Ai i’u drejtua Bullgarisë që të hapë rrugën, duke hequr veton ndaj Maqedonisë së Veriut. Në krah të Ramës ishte Presidenti i Bullgarisë, kur ai e bëri këtë kërkesë. Me nota humori, Rama kërkoi që Bullgaria të mos tregohet tipike europiane, por më shumë ballkanase.
“Mos jini kaq tipikë europianë, bëhuni ballkanas, hapni rrugën. Çfarë po përpiqeni të shpëtoni? Hapini rrugën bisedimeve, na lini të flasim me ta. Mos bllokoni”, tha Rama.
Kryeministri tha se “e ardhmja e Europës dhe ne nuk ftohemi është për të qeshur dhe për të qarë. Nëse është e ardhmja e Europës ne jemi Europë. Nuk ka asnjë të ardhme të Evropës pa Ballkanin Perëndimor. Nëse BE-ja do të vijojë kështu nuk do jetë mirë për ne por do të jetë keq për BE-në. Nëse do të çoheshin etërit themelues e të shihnin të ardhmen e BE-së do të mendonin të ishin më mirë të vdekur se të gjallë, po kthehen përmbys në varr. Çfarë të ardhme të Europës, më falni që po tregohem kaq Bllkanik”.
DENONCO