VIDEO/ Trafiku i armëve, 3 të arrestuar në Tiranë (Emrat)

Tre persona janë arrestuar nga policia e Tiranës të akuzuar për trafik armësh zjarri.

Indrit Dumi, 30 vjeç, Mario Çelmeta, 30 vjeç dhe Fabion Dumi, 27 vjeç, të tre banues në Tiranë, u arrestuar mbrëmjen e djeshme në fshatin Vishnje.

Aksioni

Policia njoftoi se specialistët e Seksionit për Hetimin e Trafiqeve të Paligjshme, në bashkëpunim me Forcën e Posaçme Operacionale në DVP Tiranë dhe Komisariatin e Policisë Nr. 6, si rezultat i informacioneve të mara në rrugë operative se disa shtetas po tentonin të trafikonin armë zjarri, organizuan dhe finalizuan operacionin policor të koduar “Armatimi”.

Gjatë kontrollit në automjetin tip “Smart” me drejtues shtetasin Fabion Dumin dhe pasagjer Mario Çelmetën, Policia gjeti dhe sekuestroi në cilësinë e provave materiale: 1 armë zjarri mitraloz të lehtë, 2 automatikë, 1 armë zjarri pistoletë, 1 armë gjahu, municion luftarak, 3 aparate celular. Gjithashtu, në cilësinë e provës materiale u sekuestrua dhe automjeti.

LEXO EDHE  Viktima e parë nga zjarret, Basha: Situata alarmante, Qeveria masa gjysmake

Indrit Dumi i priste 2 shtetasit e tjerë në vendin e takimit, në fshatin Vishnje, për të marrë armët dhe municionet.

“Vazhdon puna për dokumentimin e plotë ligjor të kësaj veprimtari kriminale dhe identifikimin e personave të tjerë të përfshirë në të”, njofton policia, ndërsa shton se, materialet do t’i kalojnë Prokurorisë pranë Gjykatës së Shkallës së Parë për Tiranë, për hetime të mëtejshme”.