Ish-kryeministri Sali Berisha pak ditë para zgjedhjeve të 25 prillit nuk përjashton mundësinë që partitë e krijuara nga ish-funksionarë të PD-së mund të dëmtojnë interesat elektorale të opozitës në zgjedhje.
Berisha tha se si Jozefina Topallit ashtu edhe Astrit Patozit i është bërë ftesë për bashkëpunim.
“Mirë do të ishte që të ishin në koalicion por ata refuzuan. Znj. Topalli edhe para krijimit të partisë me statut ishte anëtare e Këshillit Kombëtar të PD, pastaj krijoi partinë e saj dhe refuzoi pasi deshi të provohet”, tha ai.
I pyetur nëse këto parti mund të dëmtojnë PD në zgjedhjet e 25 prillit, Berisha tha se çdo parti tërheq vota, nuk di ndonjë parti që futet në listë dhe nuk tërheq vota. Por, Berisha sqaroi se nuk e dinte se sa vota mund të merrnin ato.
Gjithsesi ish-Kryeministri nuk përjashtoi mundësinë që Topalli apo Patozi të marrin mandat në zgjedhjet e 25 prillit.
“Nuk kam ndonjë parashikim të tillë por mundësitë janë të hapura”, tha Berisha.
Topalli dhe Patozi në deklaratat publike kanë deklaruar se pas zgjedhjeve mund të bashkëpunojnë me PD, por e kanë kushtëzuar këtë me largimin e Lulzim Bashës si kryetar i kësaj partie.
Por ky kusht, sipas Berishës, është absurd.
“Nëse t’i i thua fitimtarit që të vij unë ik ti, nuk është e mirëstudiuar. Fituesit të zgjedhjeve i thuhet jam i gatshëm që të shtrijë dorën për bashkëpunim, por nuk mund t’i thuash ik ti që të vij unë”, tha Berisha.
