Shqiptarët, 1.5 miliardë lekë për rrëshqitjen në Borsh për tekat e Ergys Verdhos dhe Salillarit

Nga BoldNews.al

Autoriteti Rrugor Shqiptar ka hapur me shpejtësi tenderin për rrëshqitjen e Borshit. Rruga që u bë meme dhe simbol i korrupsionit për javë me radhë, kësaj herë do të rikostruktohet. Por, jo me paratë e kompanisë që duhet ta mirëmbante atë rrugë, por të vetë shqiptarëve. Drejtori i ARRSH, Ergys Verdho ka hapur tenderin emergjent, duke akorduar plot 1.5 miliardë lekë të vjetra për rikonstruksionin.

BoldNews ka siguruar dokumentet e këtij tenderi, i cili ka një fond plot 136.091.758 lekë. Mësohet se kohëzgjatja e kontratës për ekzekutimin është 4.5 muaj. Tenderi do të zhvillohet në datën 5 maj, ndërsa bashkëlidhur ka edhe dokumentet e tenderit.

Sipas saj, aksi rrugor Qeparo-Sarandë përgjatë viteve 2007-2009 i është nënshtruar një rikonstruksioni të thellë duke përfshirë edhe zgjerimin e tij përgjatë gjithë gjatësisë. Kjo rrugë është përfshirë në kontratën e mirëmbajtjes në mënyrë periodike me ARRSH-në.

“Gjatë mirëmbajtjes në këto zona janë kryer vetëm disa ndërhyrje brenda sferës së kontratës kryesisht në sistemimin e shtresave asfaltike të rrugës si dhe në rregullimin e kunetave anësore me qëllim largimin e ujërave sipërfaqësore” thuhet në këto dokumente.

Sipas ARRSH-së, gjatë viteve 2013-2015 në disa zona përfshirë këtu edhe lagjen Vonja të Borshit u shfaqen dukuritë e para të problematikave të rrëshqitjeve, të cilat janë ende aktive. “Në këtë zonë konstatohet se muri mbajtës në krahun e djathtë (drejtimi Himarë-Sarandë) ka humbur aftësite e tij mbajtëse i cili është shkatërruar duke sjellë dhe dëmtim të trupit të rrugës në gjysmën e gjerësisë së tij në një gjatësi rreth 135ml. Momentalisht ky aks rrugor ka vështirësi në qarkullim dhe është bërë i pakalueshëm për mjetet e rënda” thotë vetë ARRSH.

Në dokumentet e vetë ARRSH-së thuhet se rruga ka qenë në tender për mirëmbajtjen. Por, një çarje e thellë dhe shkatërruese përshkoi rrugën kombëtare Llogara-Sarandë në fshatin Borsh, pas shirave të para të Janarit 2021. Në verën e vitit 2020, ky aks rrugor i ishte nënshtruar procesit të mirëmbajtjes nga kompania “Salillari”, e cila ka nënshkruar një kontratë mbi 13 milionë euro me Autoritetin Rrugor Shqiptar, për periudhën 2017-2022.

Por, ndërhyrja e “Salillarit”, e cila në fotot propagandistike të Autoritetit Rrugor Shqiptar duket si vizatim i përkryer, në fakt rezultoi një dështim total. Rruga u nda në mes dhe një pjesë e saj u rrëzua, duke e shndërruar këtë aks rrugor në thuajse të pakalueshëm.

Pas kësaj ngjarjeve, reagoi Kontrolli i Lartë i Shtetit (KLSH), i cili njoftoi publikisht se ka nisur një procedurë audituese urgjente për hartimin e projektit dhe, sidomos, zbatimin e tij. Dhe, me gjithë këto abuzime, shqiptarët do të paguajnë sërish për tekat e Ergys Verdhos dhe të kompanisë “Salillari”.