Brenda 3 vitesh, 13 të vrarë në Shkodër/ Çfarë ndodh në kryeqendrën e veriut

Në më pak se tre vite, në Shkodër janë vrarë në mënyrë misterioze 13 persona, ndërsa janë zhdukur dy të tjerë.

Ekzekutimi i fundit, ai i Bardhok Pllanajt, ndërsa brutaliteti i vrasjes së “Kumbarit”, siç njihej në Shkodër, tregon se lufta mes grupeve kriminale ka marrë qytetin, ndërsa policia nuk ka zbardhur asnjë ngjarje të rëndë.

Në vitin 2017, policia përmendi numrin e grupeve kriminale në Shkodër. Pas goditjes së një baze prostitucioni, ministri i Brendshëm i asaj kohe shkruajti në rrjetet sociale se në qytetin e Shkodrës operonin të paktën dhe 2 grupe të tjera kriminale, por që nga ajo kohë nuk u goditën kurrë.

Ndonëse policia nisi arrestimet në vitin 2017, ngjarjet e raportuara në media flasin për konfliktin mes grupeve rivale.

Hetuesit dyshojnë se ekzekutimi i Bardhok Pllanajt, në Dobraç të Shkodrës, tregon se kemi të bëjmë me luftën mes grupeve kriminale, e cila mund të ketë lidhje me serinë e ekzekutimeve që nisën që në vitin 2018.

Seria e ngjarjeve të rënda kriminale nisi atentatit ndaj biznesmenit Lulzim Kulla, në janar të vitit 2018.

Shpërthimi i telekomanduar shkaktoi tetë persona të plagosur, mes të cilëve dhe vetë Kulla. Pas plagosjes së Lulzim Kullës, i cili është dhe dhëndri i familjes Lici, një seri ngjarjesh ndodhi brenda vitit në Shkodër.

Që nga ekzekutimi mafioz i ish-efektivit Boran Bërcana e deri në vitin 2019, kur u ekzekutuan vëllezërit Astrit dhe Brahim Bilali, babai dhe xhaxhai i Asmer Bilalit, i dyshuar si pjesë e grupit Bajri.

Edhe pse policia dhe prokuroria asnjëherë nuk kanë mundur të gjejnë lidhjet mes ekzekutimeve mafioze, që nga 2017 e deri më sot, pas 4 viteve, Shkodra vijon të jetojë me praninë e dy grupeve kriminale.