Paradite punë, pasdite heqim njerëzit nga puna…!

Nga Boldnews.al

Lali Erin nuk e ndal më njeri në Tiranë, ka marrë aq hov sa nuk do jetë më në gjendje të zbusë hapin as kur të jetë në buzë të greminës. Në Tiranë, të gjithë punonjësit që janë në varësi të bashkisë së kryeqytetit, nuk kanë kohë për pushim, jo se i përgjigjen slloganit të fushatës, por kanë marrë urdhra të prerë që të gjithë të angazhohen për të mbledhur vota për PS-në. Në çdo formë të mundëshme joshjeje apo presioni.

Shumë punonjës detyrohen që të shkojnë në zyrat e PS-së në njësitë administrative ku janë caktuar dhe po bëjnë rolin e “call center-it” të fushatës së Rilindjes. Marrin në telefon të punësuar të ndryshëm në sektorin shtetëror dhe u kërkojnë që të angazhohen në fushatë. Nuk u mjafton kaq, por u kanë vënë si “plan” që të shkojnë nga 50-100 vota të sigurta, duke bredhur në farë e fis, fqinj apo miq. Kjo është forma më e mirë për të mbajtur vendin e punës.

Nëse për arsye të ndryshme nuk paraqiten në fushatë, ka nisur spatrimet, ku edhe në këtë pikë tregohen edhe më shumë se malinj, duke shkruar përbri emrit që nuk merr pjesë në fushatë: “të ngrihet në detyrë”… Në këtë rast do të thotë shkarkim nga puna.

E njëjta situatë është edhe në sistemin e shëndetësisë dhe nuk kishte si të mbetej pa u trazuar edhe QSUT. Një muaj më parë, administratorët në bashkëpunim me drejtuesit e burimeve njerzore, kanë kërkuar të dhënat për të gjithë personelin, duke nisur nga mjekët, infermierët dhe sanitaret. “Ju lutem më duhen të hedhura ne A4, gjithë stafi juaj (emër, atësi mbiemër) mjekë, infermierë, sanitarë! Arsyeja, regullim strukture. Na duhen edhe numrat e telefonëve të secilit”. Ky është njoftimi që administratorët u kanë nisur personelit drejtues infermieror. Nën “argumentin” (rregullim strukture), po bëhet presion për zgjedhjet. Madje kanë nisur edhe “lëvizjet ndëshkuese” për individë të cilët nuk angazhohen politikisht në fushatën e PS-së.

LEXO EDHE  LSI ankimim në KAS: Të shpallen të pavlefshme zgjedhjet në qarkun e Gjirokastrës

Për të qenë në “rregull me ligjin”, por aspak me moralin dhe të drejtën, punonjësve të pabindur që nuk marrin pjesë në fushatë, u shkon një ose dy vërejtje të stisura dhe më pas shkarkohen, duke u zëvendësuar me persona të tjerë. Rekord në këtë drejtim mban Bashkia Tiranë, ku ka pasur lëvizje në sektorë të ndryshëm në bashki edhe në hierarki. Shumë nga individët që bëhen me dëshirë “kamikazë elektorall” po u jepen poste më të larta, ndërsa të tjerë lëvizen në detyrë, qoftë edhe brenda një sektori, por gjithnjë me ulje, madje me frikën se do u mbërrijë “fermani i Lalit”, që i shkarkon nga detyra.

E njëjta situatë është edhe me Drejtoritë Arsimore, ku mësuesit shantazhohen dukshëm që minimalisht duhet të deklarojnë votën për PS-në, ndryshe i pret largimi nga detyra. Një tjetër formë është edhe joshja nëpërmjet hapjes së vendeve të reja të punës, ose punësime elektorale që kanë nisur tre muaj më parë. Bashkia Tiranë ka shtuar numrit e punonjësve të Policisë Bashkiake në muajt e fundit, e cila në këtë rast përkthehet si formë joshjeje për të siguruar sa më shumë vota.