FOTO/ Ilir Beqaj fushatë me mjekë e infermierë, shkel Kodin Zgjedhor. Bushati apel OSBE-ODIHR

Drejtuesi Politik i PD-së në Qarkun e Shkodrës, Helidon Bushati, denoncoi sot shkeljen e Kodit Zgjedhor nga Ilir Beqaj, drejtues politik i PS-së, po në këtë qark, i cili u shfaq sot me personelin shëndetësor në Pukë e Fushë Arrëz duke bërë fushatë për PS.

“Institucionet publike nuk mund të kthehen në zyra elektorale në shërbim të propagandës rilindase, që sot, rrezikon të infektojë standardet e këtyre zgjedhjeve.

Jemi vetëm në ditët e para të fushatës zgjedhore dhe nuk kanë vonuar të tregojnë fytyrën e vërtetë. Atë të shkeljës së ligjit.

Nuk përbën më çudi fakti se Ilir Beqaj shkel ligjin. Shqetësues është fakti se nuk i tremben forcës së ligjit.
Institucionet e varësisë të Ministrisë së Shëndetësisë nuk mund të jenë peng dhe nuk mund të keqpërdoren nga një ish-ministër dhe kandidat që mund të mendojë se është mbi ligjin”, shprehet Bushati.

Ai thekson se përdorimi i institucioneve, fondeve dhe administratës publike, është shkelje e rëndë dhe flagrante e nenit 91 të Kodit Zgjedhor, i cili ndalon përdorimin e aseteve publike në fushatën elektorale dhe burime njerezore.

LEXO EDHE  Nisja e shkollës, ekspertët grekë flasin për vaksinimin

Bushati i bën thirrje misionit vëzhgues OSBE-ODIHR dhe përfaqësive diplomatike të BE-së dhe SHBA-së të kenë parasysh këto shkelje flagrante të ligjit dhe cënimin e zgjedhjeve të lira.

“Ilir, ka një fije të hollë që e ndan njerzillekun me cinizmin. E mesa lexoj këtë e ke të vështirë ta kuptosh.

Të falenderosh bluzat e bardha për punën e tyre është vërtetë njërzillek, dhe ty si krijues i “Shëndetësisë falas” të takon.

Por ta shoqërosh një falenderim ndaj tyre me #votopartinë që infektoi të ardhmen e Shqipërisë, është cinizëm.
Ta kuptoj hallin, edhe pse nuk ka cinizëm dhe shkelje ligji që të ndan ty nga humbja e 25 Prillit që të ka rezervuar Shkodra”, shprehet Bushati, duke publikuar edhe foton e mëposhtme.