Kryeministri Edi Rama ka vijuar sulmet ndaj opozitës, ndërsa ishte në zonën e Kombinatit, lidhur me procesin e rindërtimit.
“Votoni më 25 prill për fëmijët tuaj, që kërkojnë shkolla si ato që po ndërtojmë ne, që po ndërton Lali në Tiranë, nuk u duhen fëmijëve autoshkolla, që s´kanë ngrohje e xhama”, tha Rama.
Ai u shpreh se kush janë ata që thonë do sjellim ndryshimin?
“Shpëtim Idrizi do sjellë ndryshimin që kur ishte drejtor dogane, ndërtoi një palë shkallë që zbriste nga shtëpia, se kishte borxhlinjtë te dera që i kërkonin borxhet?
Kush do bëjë rindërtimin e banesave tuaja, Fatmir Mediu, që shkatërroi në Gërdec nuk e di sa banesa?
Kush do i rindërtojë shtëpitë tuaja Monika? Ajo ka ndërtuar shtëpi nuk e di se sa, por i ka bërë për veten e saj.
Kush do i bëjë shtëpitë tuaja Mesila Doda? Ajo maksimumi mund të vijë në Kombinat dhe të djegi ndonjë palmë që ju zë diellin, dhe më pas të vijë Ferdinad Xhaferri dhe të përmirësojë cilësinë e diellit.
Kush do bëjë rindërtimet Luli, që është si dhëndërr në këtë fushatë?
Se sot jam shumë i frymëzuar meqë ka nisur edhe procesi i vaksinimit masiv”, tha Rama
Ai deklaroi gjatë fjalës së tij në ceremoninë për nënshkrimin e kontratave për 10 familjet e para që do të marrin banesa të reja në Kombinat se rindërtimi dhe sigurimi i vaksinave nuk janë të rastësishme, por kanë lidhje me qeverisjen e tij.
Rama u shpreh se lekët e shtetit i kanë pasur edhe qeveritë e tjera por nuk kanë ditur t’i menaxhojnë as për të shpërndarë dëmshpërblimet për dëmet nga përmbytjet, që sipas tij janë likujduar nga qeveria socialiste.
“Kemi këtu shembujt e përmbytjeve të mëparshme të cilëve iu premtua dëmshpërblimi dhe u desh të vinim ne në qeveri që të bëhej dëmshpërblimi. Dëgjoj shumë toça që thonë se mos i bëri Edi Rama me lekët e veta. Lekët e shtetit ishin dhe përpara por nuk gjendeshin lekët e shtetit për të bërë këto gjëra”, tha Rama.
