Nga Boldnews.al
Një nga tenderat më të diskutuar të mirëmbajtjes së rrugëve është padyshim kontrata D, ajo e rrugëve të Jugut të Shqipërisë.
Një nga firmat që qendron pas Rilindjes është pikërisht Salillari, e cila që nga muaji mars i vitit 2017 mirëmban qindra kilometra rrugë, afat i cili është deri në vitin 2022.
Për këto punë publike kjo firmë paguhet me plot 13.7 milionë euro nga taksat e shqiptarëve.
Shembja e një pjese të segmentit të bregdetit, disa muaj më parë, vuri në dyshim të gjithë kontratën. Por, sipas një vëzhgimi të BoldNews, rezulton se segmenti nga Vlora deri në Qafën e Llogarasë është i shkatërruar.
Edhe këtë segment duhet ta mirëmbajë Salillari, i cili vetëm sa ka bërë disa mbushje gropash. Por, kushtet e ndryshueshme atmosferike kanë sjellë që këto gropa të rihapen sërish. Madje, janë rrëzuar edhe barrierat mbrojtëse, teksa pjesë – pjesë asfalti ka lëvizur.
Duhet ndërhyrje e plotë për të rregulluar këto defekte, por deri më tani një gjë e tillë nuk është realizuar. Gjendja e rrugës, pavarësisht se shqiptarët paguajnë dhjetëra miliona euro, është skandaloze. Por, nga ana tjetër, Thesari i Shtetit lëvron çdo muaj pagesa për llogari të Salillarit.
