Xhakolli i Pogradecit bën “bingo”, tender 8 mln euro me vetëm 1 firmë në garë

Nga Boldnews.al

Një nga qarqet ku po përqendrohet Rilindja është Korça. Kryetarët e bashkive janë vënë “në rresht” në këtë prag fushate, teksa muajt e fundit janë xhiruar miliarda lekë.

Duke pasur në dorë dy pushtetet, qendrorin dhe lokalin, Rilindja është futur me gjithë artilerinë, teksa mënyra më e mirë është shpërndarja e fondeve me tendera.

Dhe, kush më mirë se Ilir Xhakolli, kryetari i Bashkisë së Pogradecit, mund të hidhte miliarda lekë. BoldNeës ka siguruar dokumentet e një tenderi që ka zhvilluar Bashkia e Pogradecit, ku plot 8 milionë euro i janë dhënë një firme, e cila ka garuar e vetme në këtë tender.

Mund të duket e pazakontë në dokumente, ku për 8 milionë euro nuk ka konkurencë.

Nga praktikat e mëparshme, 2 janë mundësitë; a) Xhakolli i ka bërë dokumentet për t’ia përshtatur fituesit. b) Drejtuesit politikë në qark kanë ndërhyrë.

Megjithatë, duke iu referuar dokumenteve, mësohet se tenderi ka qenë me objekt “ndërtim i ujësjellësit rajonal Çërravë & Dardhas-Burimet e Gurrasit”.

Në mënyrë ironike shkruhet se fituesi zgjidhet çmimi më i ulët.

“Njoftojme se ka qenë pjesëmarrës në procedurë firma CURRI SHPK, me vlerë 774.852.484 lekë” thuhet në dokumente, firmë e cila ka marrë rreth 99% të fondit limit. Në fund, duke mbrojtur veten, Ilir Xhakolli, ia ka kaluar të drejtën e firmës sekretares së përgjithshme Klajda Gusho.

Duke qenë ujk i “vjetër” në bërjen e letrave, Xhakolli e ka ditur mjaft mirë peshën e kësaj firme, pasi nëse do të kemi një hetim administtativ apo penal, atëherë do të “zbulohen edhe petët e lakrorit”.
Por, në këtë situatë, 8 milionë euro të hedhura para zgjedhjeve janë një armë më shumë për Rilindjen.