Kryeministri Edi Rama ka ironizuar nga Elbasani disa nga drejtuesit e partive opozitare, si dhe kreun demokrat, Lulzim Basha.
Në kuadrin e takimeve për fushatën e zgjedhjeve parlamentare, Rama tha se opozita nuk ka më çfarë t’i ofrojnë vendit, duke shtuar se drejtuesit opozitarë kërkojnë vetëm të përfitojnë nga pushteti.
“Çfarë propozuan ata… Agron Duka ka firmosur për të qenë përsëri Ministër i Bujqësisë, kthehet në një sektor ku tani është në një tjetër nivel… Mediu kërkon të rikthehet në qeveri, o karrigen o s’ka…
Shpëtim Idrizi me Vangjel Dulen duan të kthehen në qeveri…Edhe Nard Ndoka që në fund të fundit e meriton më shumë se të gjithë se na bën të qeshim…”, tha Rama.
“I kanë humbur shanset për ta drejtuar këtë vend, ndërsa sot janë të gjithë bashkë ndërkohë që në zgjedhje futen medemek veç e veç.
Demokratëve ju thuhet votoni PD, por për çfarë për të marrë Monika Kryemadhin, apo të tjerët që nuk kanë çfarë t’i ofrojnë shqiptarëve. I kanë pasur të gjitha shanset që t’i tregojnë shqiptarëve se çfarë janë në gjendje të bëjnë.
Ne këtu nuk vijmë duke rrahur gjoksin për të thënë se çfarë kemi bërë, por për t’ju thënë se jemi në përpjekje për të bërë më të mirën, duke reflektuar në skuadrat tona atë që është kërkesa bazë e shoqërisë.
Një pasqyrë ku gratë dhe vajzat janë një forcë e madhe jo sepse e kërkon ligji…Çfarë ofrojnë ata për Shqipërinë, një koalicion ku Iliri dhe Saliu vënë në thundrën e tyre drejtësinë, një koalicion ku Saliu, Ilir dhe Monika, sepse Luli është një kukull për t’i dhënë buzëqeshje pamjes”, i bëjnë karshillëk dynjasë”, u shpreh kryeministri.
