I vuri zjarrin Drejtorisë Arsimore, kush është 33-vjeçari i diplomuar për pikturë

Të tjera detaje janë zbardhur nga ngjarja e ndodhur mesditën e sotme në Drejtorinë Arsimore në Fier, ku një 33 vjeçar i vuri flakën godinës.

Nga raportimet mësohet se autori i ngjarjes, Indrit Alushaj është me profesion piktor dhe është diplomuar për pikturë në Universitetin e Arteve. Ai punonte si specialist në DAR me kontratë provizore.

Alushaj synonte të emërohej përfundimisht në këtë detyrë, por deri më tani kjo nuk ishte realizuar.

Ky thuhet të jetë edhe shkaku i aktit ekstrem të ndërrmarrë, ku në shenjë hakmarrje dogji zyrën e drejtorisë arsimore në Fier.

Me një shishe me benzinë në dorë, Alushaj ngjiti rreth orës 15.30 shkallët e ndërtesës së DAR Fier.

Ai është ndalur në katin e dytë, ku pasi spërkati me benzinë objektin i vuri flakën dhe zjarri u përhap në disa zyra.