Modelja dhe këngëtarja Kleoniki Delijorgji thotë se është e para në botë që i ka kënduar një këngë të dashurës së ish-të dashurit të saj, duke e falënderuar.
E ftuar në emisionin “Ftesë në 5”, ajo tha se kishte përjetuar një ngjarje traumatike për të dy vite më parë, pasi kishte parë në rrjetet sociale një foto të të dashurit të saj me një vajzë tjetër.
Pavarësisht dhimbjes, ajo thotë se femrat nuk duhet të konkurrojnë me njëra-tjetrën, nuk duhet të krahasohen me njëra-tjetrën dhe se të gjitha janë “perëndesha”. Niki shprehet se e dashura e ish-të dashurit zgjoi te ajo pikërisht këtë “traumë” dhe se ajo punoi për ta “shëruar këtë plagë”.
“Jam e para në botë që bëj një gjë të tillë. Neve femrave na jepet ideja që duhet ta krahasojmë veten me njëra-tjetrën. Ajo ka rizgjuar te unë këtë lloj traume dhe unë kam punuar për këtë. Ajo mua ma ka prekur këtë plagën dhe unë i kam dhënë rëndësi, e kam shëruar. Ka dy vite që ka ndodhur si histori dhe unë tani jam gati ta nxjerr. Unë isha e lidhur, ishte dashuria e parë e vërtetë dhe si ne femrat që ëndërrojmë si nëpër filma që do përfundojmë bashkë. Pastaj pash një foto të të dyve duke u puthur, u ndjeva e shkatërruar normalisht. Ne ishim të ndarë, pro unë po shpresoja që do të riktheheshim. Por tani ka kaluar dhe unë mendoj që femrat nuk kanë pse të ndjenë atë garën mes njëra-tjetrës. Të gjitha femrat janë perëndesha”, tha ajo.
