Në një lidhje direkte nga SHBA për emisionin “Tempora”, virologu Arban Domi, teksa komentoi situatën me Covid-19 në Shqipëri, është shprehur se “thembra e Akilit” në vendin tonë është testimi.
“Dua të ndalem te testet. Nuk po ndalem te spitalet dhe klinikat, se nuk jam mjek. Jam virolog. Unë mendoj që “thembra e Akilit” në Shqipëri është testimi. Ka qenë kohë më parë dhe vazhdon të jetë po testimi. Nuk mund të kontrollohet kjo pandemi as me vaksina, duke ditur numrin e mundshëm të vaksinave, por vetëm me teste.
Do doja shumë të shihja dritë në fund të tunelit, por Shqipëria nuk është futur ende në tunel”, tha ai.
Sonila Meço: Në dhjetor keni bërë një parashikim shumë të saktë edhe për shkurtin. Ku e bazoni këtë?
Arban Domi: Janë dy elementë: elementi i parë është varianti i ri. Dihej që varianti i ri do të shtonte infeksionet. Ka më shumë se gjashtë javë që është thënë se janë çuar disa mostra për testim dhe sekuencim. Në një kohë pandemie, edhe në Britani punojnë 24 orë në ditë. Për më tepër që sekuencimi nuk ka ndonjë punë të madhe njerëzore për arsye se mostra përgatitet për disa minuta. Bëhen me dhjetëra mijëra sekuencime në ditë. Më duket pak absurde të mos ketë ardhur përgjigja.
Kam sjellë një tabelë. Në këtë tabelë janë të dhënat nga data 8 shkurt deri sot. Janë katër javë. Java e dytë, e tretë dhe e katërt e shkurtit dhe java e parë e marsit. Në kolonën e dytë është numri i testeve. Në kolonën e tretë janë rastet pozitive dhe diskutimet në media janë ulje apo jo e numrave. Të krahasosh numrat nga dita në ditë kur ke numër të ndryshëm testesh e para është e pamundur. Në kolonën e fundit unë kam bërë normalizimin e të dhënave duke marrë 4200 teste në ditë. Rëndësi të madhe ka edhe incidenca, që është në kolonën e parafundit. Nëse bëhen 100 teste në ditë dhe dalin pozitivë 27 persona, incidenca është 0.27 ose 27%. Nëse e ndjekim nga data 8 shkurt incidenca është 0.27, 0.28, 0.29. Është stabël. Në javën e tretë është 0.29 dhe shkon deri në 0.30. Në javën tjetër ka një rënie të lehtë, ndërsa dje dhe sot fatkeqësisht rikthehet në numrat e javëve të mëparshme.
Personalisht nuk e shoh këtë rënie të numrave.
DENONCO