Gjykata Kushtetuese rrëzoi sot kërkesën e KLSH, e cila kërkonte shfuqizimin, si të papajtueshëm me Kushtetutën e Republikës së Shqipërisë, të nenit 50, pikat 1 dhe 2, të ligjit nr. 68/2017 “Për financat e qeverisjes vendore”.
Në kërkesën e KLSH gjithashtu parashikohej pezullimi i zbatimit të nenit 50, pikat 1 dhe 2, të ligjit nr. 68/2017 “Për financat e qeverisjes vendore”, deri në marrjen e një vendimi përfundimtar nga Gjykata Kushtetuese”.
Në përfundim të shqyrtimit, Gjykata Kushtetuese, vendosi rrëzimin e kërkesës.
“Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar”, thuhet në vendimin e publikuar nga Kushtetuesja.
Referuar vendimit të Kushtetueses, i cili lë në fuqi variantin e Qeverisë, financat e pushtetit vendor, do të auditohen nga një kompani private. Në fakt mënyra se si Qeveria ka menduar të auditojë financat e bashkive, qoftë edhe të një pjese të tyre, cënon pavarësinë e KLSH. Përtej kostove që do të përfitohen nga një apo disa auditues të jashtëm, në thelb ajo që cënohet është pikërisht pavarësia e KLSH.
Në këtë nen thuhet se Ministri i Financave dhe Kryetari i Kontrollit të Lartë të Shtetit përcaktojnë me udhëzim të përbashkët rastet kur auditimi realizohet nga auditues të tjerë ligjorë, si dhe procedurat, afatet dhe standardet e auditimit të jashtëm nga këta auditues.
KLSH ankimoi ligjin në Kushtetuese me argumentin se Ministria e Financave është vetë subjekt që auditohet nga KLSH-ja dhe se përfshirja e kompanive private është rast i paprecedent, sepse jepen para nga buxheti i shtetit për të kontrolluar financat e qeverisjes vendore nga kompani private.
Tashmë duhet pritur se cila kompani private do të përzgjidhet për të kryer auditimin e bashkive, pra që do të përfitojë para nga buxheti i shtetit
Neni 50
Auditimi i jashtëm
Veprimtaria financiare dhe zbatimi i buxhetit vjetor të njësive të vetëqeverisjes vendore u nënshtrohen çdo vit auditimit të jashtëm.
Auditimi i jashtëm realizohet nga Kontrolli i Lartë i Shtetit ose auditues të tjerë ligjorë.
Ministri i Financave dhe Kryetari i Kontrollit të Lartë të Shtetit përcaktojnë me udhëzim të përbashkët rastet kur auditimi realizohet nga auditues të tjerë ligjorë, si dhe procedurat, afatet dhe standardet e auditimit të jashtëm nga këta auditues.
Kryetari i njësisë së vetëqeverisjes vendore e dërgon raportin e auditimit të jashtëm në këshillin e njësisë së vetëqeverisjes vendore si pjesë e raportit vjetor të konsoliduar të zbatimit të buxhetit vendor. Një kopje e këtij raporti i dërgohet Kontrollit të Lartë të Shtetit dhe Ministrisë së Financave.
Për të gjitha raportet e auditimit të jashtëm, të kryera nga Kontrolli i Lartë i Shtetit apo auditues të tjerë ligjorë, kryetari i njësisë së vetëqeverisjes vendore përgatit një plan veprimi për zbatimin e rekomandimeve të raportit të auditimit dhe raporton rregullisht në këshillin e njësisë për progresin në zbatimin e tij.
