Arbjan Mazniku, zv.Kryetar i Bashkisë së Tiranës, dhe një nga njerëzit më të afërt të kryebashkiakut Erion Veliaj, përfiton mijëra euro në muaj, duke qenë anëtar i të paktën 12 bordeve.
Mazniku është pjesë e kompanisë koncensionare “Eco Tirana” si drejtor administrativ me një pagë mujore prej 1500 euro, për të vijuar më pas me pagën 1000 euro në muaj si kryetar i Këshillit Mbikqyrës të UKT.
Në total nga 12 bordet ku bën pjesë, por me paga në të paktën 9 prej tyre, Mazniku përfiton 6200 euro çdo muaj. Dhe të mendosh se shfaqen në media apo në takime duke bërë moral, duke folur për projekte dhe për zhvillim.
Zyrtari i bashkisë së kryeqytetit, dikur një ish-anëtar i Mjaft, më pas i G99 dhe së fundmi i PS së Rilindur me Edi Ramën, Erion Veliajn apo Elisa Spiropalin, pavarësisht përfitimeve që merr si anëtar i 12 bordeve, mund të quhet maja e ajsbergut, po të kihen parasysh denoncimet miliona euroshe që bëhen publikisht.
Dhe referuar përfitimeve disa miliona lekë në muaj, në një kohë kur shqiptarët largohen nga vendi për shkak të varfërisë, apo bizneset ulin qepenat për shkak të krizës ekonomike, kuptohet qartë pse Rilindja kërkon mandatin e 3-të qeverisës.
Ja përfitimet e Arbjan Maznikut
1– Drejtor Administrativ i kompanisë koncesionare “Eco Tirana” me pagë mujore 1500 Euro, ku Bashkia ka 51% aksione, ndërsa grupi mafioz “Ndraghet’a” ka 49% aksione.
2– Kryetar i Këshillit Mbikëqyrës të Ujësjellës-Kanalizime Tiranë, me delegim nga kryetari statutor Erjon Veliaj, ku paguhet 1000 Euro në muaj.
3– Mbikëqyrës i administrim-likujdimit të kompanisë “TI-VA Sh.a” me pagë 500 Euro; shoqëri prodhim-shitje materialesh ndërtimi, ku bashkia është pronare me 51%, ndërsa 49% i ka firma italiane veroneze “Ital-Tub”.
4– Administrues i përkohshëm i Ndërmarrjes Studentore Nr. 3 Tiranë, me pagesë mujore 600 Euro; qysh prej datës 15.08.2020, pas ndarjes nga jeta të ish-adminisratorit Ndue Ndoci.
5– Mbikëqyrës për administrim-likujdimin e shoqërisë “SPORT KLUB FARKA me pagë mujore 300 Euro; e cila është 49% në pronësi të Bashkisë Tiranë, 31% në pronësi të Çim Fushës e 20% në pronësi të ish-kryekomunarit të PD, Fatbardh Plaku.
6– Zv/kryetar i Bordit “KLUB-FUTBOLL TIRANA”, ku Bashkia është 34% pronare; si dhe mbikqyrës i deleguar administrativ prej kryetarit të Bashkisë Tiranë, me pagë mujore 700 Euro.
7– Zv/kryetar i Këshillit Mbikëqyrës të Fondacionit Kredi-Biznes-Ndërtime “CRIMSON FINANCE FUND ALBANIA”, me pagë mujore 800 Euro, ku Bashkia-Tiranë është pronare me 25%, në ortakëri me Aleksandër Sarapuli dhe kompaninë “Aleat” të pasaportave.
8– Kryetar i Këshillit Mbikëqyrës të kompanisë “TIRANA AGRIKULTURE shpk” krijuar më 15.07.2020, në pronësi 100% të bashkisë, por ende pa pagë.
9– Kryetar i Këshillit Mbikëqyrës të kompanisë “TIRANA DC Sh.a” krijuar më 28.10.2020; me aktivitet rindërtimi tërmeti, evente kulture, import makineri, transaksione pronash etj.; në pronësi 100% të bashkisë, ende pa pagë.
10– Emëruar nga kryebashkiaku Veliaj, në postin Drejtor i Projekteve të punëve publike që krediton grupi “Abui Dhabi” për Bashkinë-Tiranë; nuk dihet sa e ka pagën mujore.
11– Emëruar në Bordet e 4 Universiteteve Publike të Tiranës, me të drejtë vote, si përfaqësues i pushtetit lokal dhe pagë mujore nga 200 Euro tek secili.
12– Deleguar nga kryetari i Bashkisë Tiranë, Veliaj, si përfaqësues-anëtar bordi në vend të tij në FSHZH, me pagë mujore 600 Euro.
