Deputetja e Partisë Demokratike, Albana Vokshi, ka reaguar me një mesazh pasi Gjykata e Posaçme (GJKKO) e shpalli të pafajshme ndaj padisë për shpifje të ngritur nga Vilma Nushi, e përfshirë në koncesionin e “Check-Up”-it.
“Ky vendim ishte i pashmangshëm. Ishte i bazuar në fakte që nuk mund të fshiheshin, pavarësisht presioneve”, shkruan Vokshi, duke akuzuar qeverinë dhe kryeministrin Edi Rama për lidhje klienteliste me bizneset që përfitojnë nga fondet publike.
Vokshi nuk e konsideroi çështjen si personale, por si pjesë e një beteje publike kundër korrupsionit dhe koncesioneve të dështuar që, sipas saj, “vjedhin qytetarët dhe shkatërrojnë sistemin shëndetësor në Shqipëri.”
Deputetja u bëri thirrje qytetarëve që të mos pranojnë “dhunën e shtetit kriminal”, “rrjepjen me çmime abuzive” dhe “vjedhjen e votës”.
“E vërteta vonon, por nuk harron! GJKKO më shpalli të pafajshme ndaj padisë për shpifje nga Vilma Nushi. Ishte një vendim i pashmangshëm. Një vendim i bazuar në fakte që nuk mund të shtrembëroheshin, nuk mund të fshiheshin, pavarësisht presioneve. Përballë nuk kam thjesht dikë që ka një biznes, por një biznes që financon Edi Ramën në fushatë, dhe që Edi Rama e ka shpërblyer me miliona euro nga taksat tona për koncesionin e dështuar të check-up-it. Kam një apel për çdo qytetar: Mos heshtni! Nëse heshtim sot, do të bëhet edhe më keq nesër. Mos pranoni dhunën e qeverisë dhe të Edi Ramës që ju zhvat me taksa dhe vendime të padrejta! Mos pranoni dhunën e oligarkëve që ju rrjepin me çmime të larta abuzive, që nga ilaçet deri tek ushqimet! Mos pranoni të rimbursohen miliona euro për ilaçe që nuk hyjnë kurrë në Shqipëri! Mos pranoni dhunën e një shteti kriminal që ju vjedh votën dhe pastaj ju merr gjithçka tjetër pa ju pyetur! Beteja ime nuk është personale. Kam ngritur zërin për interesin publik: që të qeverisemi më mirë, të mos vidhemi, të jetojmë në një vend më të drejtë. Shqiptarët meritojnë shëndetësi, meritojnë të trajtohen dhe jo të vriten në dyert e spitaleve! Pa shëndetësi, nuk ka jetë! Nuk ka integrim! Mua do të më ketë përballë kushdo që pushtetin e përdor për të vjedhur njerëzit dhe për të na e bërë jetën më të vështirë të gjithëve”, shkruan Vokshi.
