Nga Boldnews.al
Kryeministri Edi Rama deklaroi nga Elbasani paraditen e kësaj të diele se “drejtësia arrestoi për herë të parë gjyqtarë të korruptuar”, duke e konsideruar si sukses të “Reformës në Drejtësi” që ai dhe vetëm ai e do rastin e arrestimit të gjyqtares së Krujës, Enkelejda Hoxha.
Por, Rama vetë, si edhe qytetarët e Shqipërisë e kanë të qartë që kjo deklaratë e kryeministrit është thjeshtë një “batutë elektorale”, e mbështetur në të pavërteta.
Së pari, arrestimi i gjyqtares Hoxha nuk mund të quhet “sukses”, përsa kohë që ndaj saj ekzistojnë vetëm dyshime të bazuara në prova dhe ende nuk ka një vendim fajësie për “korrupsion”.
Nga ana tjetër, gjatë viteve të fundit, prokuroria dhe gjykata shqiptare, edhe ajo para “Reformës në Drejtësi”, ka kryer hetime, ka arrestuar dhe ka dënuar gjyqtarë e prokurorë.
Për “kujtesë” të kryeministrit Edi Rama, si edhe për të prezantuar informacione sa më të sakta, më poshtë është një listë me gjyqtarë e prokurorë të arrestuar apo të hetuar, edhe para krijimit të Strukturës së Posaçme Anti-Korrupsion (SPAK).
– Në Dhjetor 2013 arrestohen kryetari i Gjykatës së Pukës, Shtjefën Lleshi dhe drejtuesi i Prokurorisë së atij qyteti, Pëllumb Prençi, nën akuzën e “korrupsionit”. Të dy këta ish-zyrtarë dhe persona të tjerë të asaj çështjeje u shpallën fajtor dhe u dënuan.
– Në 27 Nëntor 2015 arrestohet prokurori i Fierit, Përparim Vukaj, nën dyshimet për korrupsion. Vukaj u shpall i pafajshëm me vendim të Gjykatës së Apelit
– Në 2 Dhjetor 2015 arrestohet prokurori i Krujës, Haxhi Giu, nën akuzën e korrupsionit. Gjykata e shkallës së parë për Krime të Rënda e gjeti fajtor dhe e dënoi ish-prokurorin.
– Në 2 Maj 2016 arrestohet gjyqtari i Tiranës, Ibrahim Hoxha, nën akuzën e korrupsionit.
– Në 16 Korrik 2016 merret masë “pezullim nga detyra” për anëtaren e Gjykatës së Lartë, Majlinda Andrea, nën dyshimet për korrupsion. Andrea shpallet fajtore dhe dënohet në përfundim të procesit gjyqësor.
– Në 10 Nëntor 2017 arrestohet gjyqtari i Apelit të Tiranës, Shkëlqim Miri, nën akuzën e korrupsionit. Ai u shpall fajtor dhe u dënua.
– Në 9 janar 2019 arrestohet gjyqtari i Fierit, Roland Hysi, nën akuzën e korrupsionit
Rastet e mësipërme tregojnë se kryeministri Rama, më së paku nuk ka informacion. Por, duket se ai po e përdor rastin e arrestimit të gjyqtares Hoxha si “sukses” të qeverisë së tij, ndërkohë që Reforma në Drejtësi, përfshirë edhe krijimin e SPAK-ut, është produkt i një votimi me 100 përqind të votave në Parlamentin shqiptar.
DENONCO