Nga Boldnews.al
Mes dhimbjes për humbjen e babait Rifat Laho nga Covid-19, dy motrat denocuan se mjekë të Spitalit Infektiv nuk i kishin dhënë shërbimin e duhur. Por ndërsa lotët e tyre ende nuk janë tharë, u vjen një mandat në derë: “akuzoheni për përhapje të informacioneve të rreme”!
Të tronditura për humbjen e babait ata akuzuan se e sollën me jetë dhe jo në gjendje shumë të rëndë shëndetësore, pas pak orësh morën lajmin se vdiq nga komplikacionet. Sipas dëshmisë së tyre, stafi mjëkësor në Spitalin Infektiv nuk kishte dhënë shërbimin e duhur, duke iu referuar bisedave që kishin pasur më parë me të atin, ndërsa ishte ende në jetë.
Por kjo dëshmi solli një tollovi të madhe me shumë qytetarë që nisën ankesat në seri për mungesë shërbimi në spitalet Covid. Vetë Rama e përmendi këtë rast, duke e mohuar se në spitale nuk jepej shërbimi i duhur dhe kaq mjaftoi që policia të hapte një procedim penal, duke u yshtur pikërisht nga kreu i qeverisë. Rezultati nuk mungoi…
“Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke. Punohet për sqarimin e rrethanave të ngjarjes. Materialet i kaluan Prokurorisë së Rrethit Gjyqësor Tiranë, për veprime të mëtejshme”-thuhet në njoftimin e policisë së kryeqytetit.
Në fakt akuza është e ngjashme me atë të nenit 55 të kohës së diktaturës për “agjitacion dhe propagandë kundër shtetit”. Sot i madh e e vogël, kushdo që ka kapërcyer pragun e spitaleve ankohet për neglizhencë, mungesë trajtimi në mënyrën e duhur, ryshfetin dhe abuzimet që nisin nga drejtuesit e lartë të Ministrisë së Shëndetësisë dhe deri tek drejtorët e spitaleve të emëruar me ferman qeverie.
Pas akuzave të dy vajzave pati edhe akuza nga vetë mjekët, duke drejtuar gishtin tek drejtuesit e spitalit infektiv. Por për të nuk nisi masë, nuk u akuzuan. Çfarë hetimesh ka kryer kjo polici dhe prokurori për vdekjet e pesë pacientëve që u hodhën nga ballkonët e spitaleve Covid dhe humbën jetën? Kush drejtues ka mbajtur përgjegjësi për akuzat me fakte për mitmarrje ndaj familjarëve të pacientëve? Ata nuk preken, sepse edhe nën unformën e bluzës së bardhë kanë mbrojtur pushtetin duke e konsideruar si sukses përballimin e pandemisë.
Edhe nëse ato dy vajza dhanë një deklaratë në kushtet e tronditjes për shkak të dhimbjes, “kapuçonët e zinj” (një pjesë e të cilëve janë vetëofruar si policia e pushtetit), sot po tmerrojnë edhe më shumë vajzat që kanë vetëm tre ditë që varrosën njerin e shtrenjtë, atë që i solli në jetë dhe i rriti. I akuzojnë se “përhapën informacion të rremë”! Nuk po i lenë as të qajnë, pasi dhimbje pas dhimbje u shtohet kur do të duhet të përballen me drejtësinë. Pikërisht kjo e fundit, me mantelin e zi mbi supe, me dashjen e saj, apo nën trysni dhe joshje, janë futur në “xhepin e vogël” të pelerinës së zezë të kreut të qeverisë.
Hetimet selektive dhe mbi të gjitha heshtja dhe mbyllja e çështjeve të korrupsionit madhor në sistemin shëndetësor që nis nga tenderat e dyshimtë dhe deri tek konçesionet kancerogjene që thithin lubishëm orë e çast paranë publike, policia dhe prokuroria nuk heton, por mbron. Ligjin dhe akuzat ia përlasin në fytyrë vajzave të një viktime që u bënë edhe objekt i fjalëve të kryeministrit. Kujdes! Qani në heshtje dhe mos flisni, sepse pas hapjes së varrit, pushteti të hap edhe dosje penale!
