Kryetari i Partisë Demokratike, Lulzim Basha, gjatë një takimi të ditës së sotme në Durrës me përfaqësues të agjencive turistike, përveç të tjerave ka folur edhe për investimet në Portin e Durrësit, duke premtuar se kur të jenë në kryeminstër në këtë sektor, do të luftojë krimin e organizuar.
Gjithashtu kreu i Partisë Demokratike ka deklaruar se kushdo është i lirë që thotë çfarëdolloj gjëje për atë por se një gjë është e sigurt, askush nuk mund ta akuzojë për lidhje me krimin.
“Mund të thoni çfarë të doni për mua, ta thoni lirshëm sot edhe nesër, se nuk jam natyrë hakmarrëse… Por një gjë nuk e thoni dot, as kam qenë kurrë i lidhur me krimin. Përkundrazi, kam një rekord të suksesshëm të luftës kundër krimit, që ju ka sjellë të gjithëve ju një avantazh që nuk e ëndërronit para vitit 2010, heqjen e vizave…
Porti i Durrësit do të dalë nga duart e krimit të organizuar dhe klaneve qeveritare të lidhura me të. Porti i Durrësit do t’i kthehet në radhë të parë Durrësit dhe në radhë të dytë Shqipërisë. Për këtë keni zotimin dhe angazhimin tim. Nesër Porti i Durrësit do të jetë i Shqipërisë, jo i krimit të organizuar, as i klaneve qeveritare të lidhura me të”, tha Basha.
