Nga Kim Jong-un në Lukashenko

Nga Erion Dasho

Të gjithë e mbajnë mend Boratin e prillit 2020. Pas një vendimi të matur për të zbatuar masat e karantinës në muajin mars, Boratit i hyri në qejf roli i babait të rreptë të kombit që “sakrifikon” imazhin e vet të çmuar për të shpëtuar jetë! Për të shmangur 18 mijë viktimat që parashikonin “shkencëtarët” e oborrit apo kamionët imagjinarë me të vdekur dhe magazinat imagjinare me arkivolë!

Argumentet se epidemia duhej luftuar me masa inteligjente nuk i përfilli hiç dhe e mbajti vendin në një izolim donkishotesk, pavarësisht se Shqipëria e kishte kaluar përballjen me të panjohurën dhe kishte ardhur koha për masa të tipit testo-gjurmo-trajto dhe për të hyrë në tregun konkurrues të sigurimit të vaksinës.

I ngjashëm me Boratin në atë kohë ishte Kim Jong-un i cili megjithë izolimin e tmerrshëm, u frikësua në palcë nga virusi dhe nisi të ekzekutonte deri edhe kontrabandistët që sillnin mallra nga Kina. Në përpjekje për të luftuar armikun imagjinar, Kimi nuk ndryshonte aspak nga sivëllai në breg të Adriatikut!

***

Pas majit Borati hoqi dorë kur kuptoi se lufta nuk bëhej me bloge dhe vloge, por me shkencë, një fushë e panjohur dhe asnjëherë e vlerësuar prej tij. Ai humbi interesin dhe ua delegoi luftën një tufe Boratësh të tjerë, thellësisht të paaftë, të cilët nën shembullin e liderit shpirtëror kujtojnë se epidemia mund të luftohet me propagadë dhe demagogji!

Dhe erdhi stina e virozave së bashku me katastrofën që kishim paralajmëruar prej kohësh. Shqipëria sot është një Wuhan apo Lombardi e shkurt-marsit 2020. Vetëm se nuk e shohim, sepse Boratët po bëjnë çdo gjë që kanë në dorë, për ta fshehur gjendjen e vërtetë!

LEXO EDHE  Kapet me kokai*ë në banesë, arrestohet 56-vjeçari në Berat (Emri)

Shihen vetëm 1 mijë rastet sepse aq testojnë Boratët. Po të testohet më shumë, janë disa mijëra raste në ditë. Shihen vetëm 450 të shtruarit në spitalet COVID, por aspak ata qindra të tjerë nëpër spitalet e rretheve dhe shtëpi.

Shihen 10-15 të vdekurit në spitalet COVID dhe në pacientë SARS-CoV-2 pozitiv, por jo dhjetëra të tjerë që vdesin në spitalet rajonalë, spitalet privatë, shtëpi, apo edhe në vetë spitalet COVID midis pacientëve fals-negativë.
Në se do të kishim një sistem shëndetësor që u përgjigjej nevojave të popullatës dhe nuk i linte ata në shtëpi me oksigjenim 70 apo 80%, sot spitalet e Shqipërisë nuk do të dallonin nga spitalet e Lombardisë apo New Yorkut vitin e kaluar.

Faktikisht, po ndodh e kundërta. Testimi, gjurmimi dhe trajtimi po ofrohen minimalisht për të fshehur përmasat e vërteta të katastrofës, ndërkohë që Borati dhe Boratët dalin në media dhe presin shirita qendrash shëndetësore të bojatisura.

Kësaj here, Borati ka marrë shembull një tjetër sivëlla, bjellorusin Lukashenko i cili në kohën kur qytetarët e vet sëmureshin me mijëra dhe vdisnin me qindra, manipulonte kurbat e epidemisë dhe dilte në media duke ngarë traktorë apo pirë vodka.

***

Epidemia nisi me një Borat në variantin Kim Jong-un dhe po vazhdon me një Borat në variantin Lukashenko.
Ndërkohë përmasat e saj po kërcënojnë të futin në kolaps të plotë sistemin shëndetësor dhe krejt shoqërinë, duke shkaktuar me qindra vdekje të parandalueshme.

Ndërsa Kimi dhe Lukashenko, për fatkeqësinë e popujve të vet, do të vazhdojnë të pashqetësuar në rrugëtimin e tyre diktatorial, shqiptarët e kanë një shans për të ndëshkuar Boratët.

Uroj dhe shpresoj ta shfrytëzojë…