Ylli Manjani, ish-ministër i Drejtësisë, ka reaguar përmes një postimi në rrjetet sociale, lidhur me reagimet që shkaktoi intervista e ish-Kryeministrit Fatos Nano.
Manjani shkruan se Nano është një këshilltar i Ramës dhe në kushte të tilla ai s´mund të jetë mbi palët, por mbrojti shefin e tij.
“Disa huqe të Fatosit të fundpushtetit të tij Rama po na i rikujton. Mos ndenja në zyrë, bredhja nëpër botë medemek për punë por në fakt janë për qejf, si dhe çartallisja e punëve të qeverisjes si për ditë të fundit, janë pjesë nga këshillat e Fatosit…
Si muhabet kot më duket, gjithë kjo vemendje ndaj një këshilltari të Edi Ramës. Këshilltari nuk mban asnjë përgjegjësi për sa thotë. Gjë në dorë për të bërë nuk ka. Atëherë përse gjithë kjo vemendje?!
Ndaj të merremi me atë dallkaukun që merr vendime të çartallisura ende në emër të popullit shqiptar”, shkruan Manjani.
Postimi nga Ylli Manjani
Nuk e kisha parë intervistën e Fatos Nanos te Fevzo, por e lexova të zbardhur në mediat online. Doja të kuptoja arsyet e kritikës ndaj tij.
Nga ajo intervistë kuptova se Nano qenka tashmë këshilltar i Ramës. Si të gjithë këshilltarët, ka mbrojtur shefin e tij.
Këshilltari nuk pritet të jetë mbi palët apo i drejtë me të gjithë. Këshilltari, kur flet në publik, flet mirë për shefin e vet.
Pra nuk duhet parë si ish leader politik në pension që flet i pa motivuar nga palët politike. As si Fatos Nano në krye të partisë apo qeverisë, por thjesht si këshillues e Edi Ramës.
Edhe fakti që pranon të këshillojë Ramën, ska përse të jetë shqetësim sepse është thjesht zgjedhje e tij.
Mendoj që duhet të bëjmë këtë dallim ndërmjet Fatosit leader dhe Fatosit këshilltar i atij që i ka zënë vendin.
Ajo që çudit është përse Rama ka qejf të këshillohet nga Fatosi?! Nga ai Fatosi që ishte një “marksist i pandreqshëm”. Nga Fatosi “dështak” e “karagjoz si Robert Çamçakizi” etj. Nga Fatosi kundër të cilit u rrjeshtua me të gjithë bateritë mediatike dhe diplomatike, me NGO e me personazhe publike. Fatosit, kundër të cilit bëri dhe një tur nëpër Shqipëri për ta rrëzuar. Fatosit, kundër të cilit nxirrte Erion Velinë para kryeministrisë të veshur si nuse…
Nejse, disa huqe të Fatosit të fundpushtetit të tij Rama po na i rikujton. Mos ndenja në zyrë, bredhja nëpër botë medemek për punë por në fakt janë për qejf, si dhe çartallisja e punëve të qeverisjes si për ditë të fundit, janë pjesë nga këshillat e Fatosit…
Si muhabet kot më duket, gjithë kjo vemendje ndaj një këshilltari të Edi Ramës. Këshilltari nuk mban asnjë përgjegjësi për sa thotë. Gjë në dorë për të bërë nuk ka. Atëherë përse gjithë kjo vemendje?!
Ndaj të merremi me atë dallkaukun që merr vendime të çartallisura ende në emër të popullit shqiptar.
