Një përqindje e lartë e shqiptarëve (40.3%) besojnë se ka më shumë viktima nga COVID-19 në Shqipëri nga sa raportojnë zyrtarët.
Sondazhi i dytë i Barometrit Politik, kryer nga Euronews Albania dhe kompania ndërkombëtare MRB zbuloi se qytetarët ishin të ndarë midis besimit tek raportimi i saktë dhe besimit se rastet janë më të larta nga sa raportohen çdo ditë nga Ministria e Shëndetësisë.
Vetëm 41.3 për qind besojnë se janë të sakta.
13.6 për qind e të anketuarve besojnë se rastet janë më të pakta dhe se ka një ekzagjerim të shifrave. Mosha mbi 55 vjeç besojnë se shifrat janë të sakta, ndërsa moshat e reja besojnë se ka më tepër raste dhe që institucionet po i raportojnë më pak.
Të anketuarit e vlerësuan si pozitive mënyrën si qeveria punoi me sektorin shëndetësor lidhur me menaxhimin e pandemisë COVID-19.
63.9% e shqiptarëve e shihnin si disi pozitive (45.2%) dhe shumë pozitive (18.7) punën e bërë nga qeveria për COVID-19 në spektrin shëndetësor.
36.1% e të anketuarve e vlerësuan atë negativisht, një pjesë e lartë e tyre i përkisnin moshës 25-34 vjeç dhe 45-54 vjeç.
Në aspektin politik, ata që kishin votuar Partinë Socialiste në vitin 2017 patën vlerësimin më të lartë pozitiv për punën e qeverisë (94.5), ndërsa mbështetësit e PD dhe LSI kishin pakënaqësinë më të lartë përkatësisht 67% dhe 50%.
Të pavendosurit zgjedhjeve të shkuara anuan më shumë në vlerësimin pozitiv të punës (59%) përkundrejt vlerësimit negativ (40%).
Financat
Qytetarët duken të ndarë në vlerësimin e dhënë për masat financiare në përballimin e pandemisë, me një përqindje fare të lehtë (1.4%) tek negativja.
Pra, 49 për qind e të anketuarve i vlerësuan masat financiare disi dhe shumë pozitive.
50.4 për qind e tyre si disi ose shumë negative.
Të moshuarit kishin vlerësimin më të lartë pozitiv, ndërsa moshat e reja vlerësimin më të lartë negativ.
Në kampet partiake bazuar në votën e vitit 2017, socialistët ishin më të kënaqurit (81.7%) me ndihmën financiare.
Vota opozitare, por edhe të pavendosurit ishin gjithashtu me përqindje mjaft të lartë negative.
Metodologjia:
Studimi i hulumtimit të mendimeve dhe qëndrimeve të shqiptarëve për zgjedhjet e 25 prillit 2021 mbuloi 12 zona elektorale, urbane dhe rurale dhe u bazua mbi 1600 intervista ballë për ballë të meshkujve dhe femrave me të drejtë vote. Intervistat u kryen në periudhën 22 dhjetor 2020 deri më 13 janar 2021.
Tematikat e studimit ishin besimi në institucione, menaxhimi i pandemisë COVID-19 dhe menaxhimi i pasojave të tërmetit. /Euronews Albania/
