Petrit Vasili, nënkryetar i LSI, akuzoi Qeverinë Rama se është në kaos dhe në mungesë kontrolli totale ndaj pandemisë.
Referuar shifrave të larta që raportohen prej ditësh mbi personat e infektuar nga Covid-19, Vasili u shpreh se Qeveria bën propagandë në mënyrë të përditshme dhe nuk po përballet seriozisht me problemin.
“Shifrat janë kokëforta, vetëm dje ka pasur rreth 900 të infektuar, për saktësi 879. Kësaj situate, në vend që ti përgjigjen me analizë shumë të imët të saj, nxjerrjes së çdo shkaku, të çdo elementi që nuk funksionon dhe rindërtimit totalisht të punës në terren, ju e keni parë dhe vazhdoni ta shihni se si gënjen Kryeministri nga mëngjesi deri në darkë, se si shkojnë te muri i qendrës shëndetësore, që ka ekzistuar dhe ekziston prej kohësh, por këta i fusin një bojë dhe rrinë me shtatë kamerat e ERTV-së se si do ta shesin në publik dhe si do gënjejnë dynjanë.
Shifrat janë të vërteta, janë reale. Situata është shumë e vështirë në ekonomi. Procesi i ashtuquajtur i vaksinimit nuk ekziston. Pra, vaksinimi në Shqipëri nuk ekziston, nuk bëhet, ky është fakt. Trasta e vaksinave, me 900 e ca të tilla, e cila ka mbi dy javë që vjen vërdallë, siç e dini ka degraduar tërësisht si proces, pasi as nuk ka doza vaksinash të reja. Priteshin që sipas premtimeve zhurmëmëdha të Kryeministrit shqiptar se do të vinin në fillimin e javës së tretë, pra që më 15 janar, dhe asnjë lajm dhe asgjë tjetër nuk ka”, tha Vasili.
Sipas tij, qindra e mijëra të sëmurë, pasi shifra e të sëmurëve realë është shumë më e lartë se sa kjo që ekzaminohet, vetë trajtohen nëpër banesa, pa kujdes shëndetësor, pa mbështetje financiare dhe shqiptarët po robtohen e po shkatërrohen ekonomikisht e po futen në borxhe për të përballuar kurimin tepër të kushtueshëm nga COVID-19.
“Asnjë analizë nuk bëhet për humbjet e jetëve, ndonëse shifrat kanë qenë kritike dhe po nga kjo foltore kam ngritur qartë dhe prerë çështjen, që bëhet fjalë për mijëra të sëmurë që kanë humbur jetën, të cilët nuk janë evidentuar apo analizuar për të marrë masa të menjëhershme, urgjente, serioze, efikase për të përballuar situatën siç duhet.
Kjo heshtje e plotë dhe mbajtja e propagandës së një qeverie që ndërron vetëm modelet, format, ngjyrat dhe dizajnin e maskave, ky është një turp me pasoja shumë të rënda për jetën dhe shëndetin e qytetarëve.
Për më tepër zyrtarë të kësaj qeverie kanë dalë dhe flasin për një lloj të ri koronavirusi, një shtamë të ri. Por çfarë shteti është ky?
Si ka mundësi që një zyrtar çfarëdo flet për një gjë kaq të rëndë e kaq të madhe, kur në Shqipëri ka një të ashtuquajtur Komitet Ekspertësh, i cili duhet të analizonte nga pikëpamja epidemiologjike edhe virologjike gjithë të dhënat, të nxirrte konkluzionet e pastaj titullari i shëndetësisë, ministrja përkatëse, të dilte e të komunikonte me publikun, sepse ky komunikim ka të bëjë me një përgjegjësi shumë të rëndë publike dhe kombëtare. Nuk është një fjalë e hedhur në erë apo për të krijuar alibinë, apo justifikimin e radhës për ç’ organizimin total që ka kapur procesin e pandemisë, që në ditën e parë të shfaqjes së saj”, tha Vasili.
