Zgjedhjet e 25 prillit duket se janë kushti i pashkruar i Bashkimit Europian lidhur me ecurinë e procesit të integrimit të Shqipërisë në Union.
Kjo është pohuar edhe nga Kryenegociatori shqiptar, ambasadori Zef Mazhi, gjatë mbledhjes së Këshillit Kombëtar për Integrimin, kur tha se shpresonte që takimi i parë ndërqeveritar Shqipëri-BE të mbahej në qershor të 2021.
Pavarësisht deklarimeve se Shqipëria ka plotësuar kushtet dhe Gjykata Kushtetuese është vënë në funksion, duket se ajo që duhet të përmbushë është pikërisht standardi mbi zgjedhjet.
“Synimi është të mbahet kjo konferencë në qershor të vitit 2021. Edhe presidenca portugeze, kemi njoftim se e ka në prioritetet e saj mbajtjen e kësaj konfernece brenda këtij semestri, që ajo është presidente e Këshillit Europian. Kjo kohë kërkon angazhim dhe impenjim të plotë nga të gjithë”, tha ambasadori Mazi.
Zgjedhjet do të mbahen më 25 prill dhe kjo përbën ngjarjen më të rëndësishme politike në Shqipëri në muajt në vijim. Ndaj dhe duket se standardet zgjedhore do të përcaktojnë ecurinë e procesit, pavarësisht deklarimeve të diplomatëve në Tiranë apo zyrtarëve në Bruksel, që theksi vihej mbi ngritjen dhe vënien në funksion të Gjykatës Kushtetuese.
Zgjedhjet e fundit parklamentare, ato të 2017 evidentuan probleme dhe manipulime, që u pasqyruan edhe nga mediat ndërkombëtare, si rasti i Durrësit, apo dosja e famshme 339. Tashmë zgjedhjet e 25 prillit janë testi real, ndërsa përgjegjësia bie pikërisht mbi Kryeministrin Edi Rama, i cili zotëron gjithçka dhe ka nën kontroll jo vetëm ekzekutivin e Parlamentin, por edhe pushtetin vendor dhe çdo hallkë tjetër të administratës.
