“Punë të ngjashme”, si u favorizua ALEAT në tenderin 1.5 milionë euro për dokumentet e azilantëve

Nga Boldnews.al

Kompania koncesionare ALEAT, e cila ka të drejtën e prodhimit të dokumenteve biometrikë në Shqipëri për një periudhë 15-vjeçare, krahas miliona eurove që merr nga shqiptarët, tashmë favorizohet edhe në tendera të tjerë.
Arkat e kompanisë mbushen çdo ditë, ku shqiptarët paguajnë për karta ID dhe pasaporta biometrikë. Paratë e këtyre dokumenteve shkojnë pikërisht për kompaninë koncesionare.

Boldnews.al ka faktuar se kjo kompani, po favorizohet haptazi nga institucionet shqiptare. ALEAT ka marrë pjesë në tenderin prej 1.5 milionë euro të hapur nga Policia e Shtetit.

Në këtë tender kanë marrë pjesë dy kompani. ALEAT, e cila ka ofruar 156.750.000 lekë. Pra, shumë afër fondit limit të vendosur nga Policia e Shtetit. Në tender ka marrë pjesë edhe firma “Cetis Graphic and Documentation services d.d”.

Kjo kompani ka oferuar 144.375.000 lekë, rreth 100 mijë euro më pak. Por u s’kualifikua! Arsyeja? S’kishte punë të ngjashme. Normalisht, nisur edhe nga dokumentet e tenderit, policët janë treguar të zgjuar, duke i përshtatur dokumentet me kapacitetet e ALEAT.

Nëse për koncesionin e dokumenteve biometrike, u favorizua nga Ministria e Brendshme, kësaj herë është Policia e Shtetit, e varur direkt nga kjo ministri, që plotëson dokumentet në favor të ALEAT. Po le të analizojmë arsyet e s’kualifikimit.

Boldnews.al synon që të hedhë dritë mbi paratë publike, pa dashur të mbrojë njërën apo tjetrën palë. Nga hulumtimi jonë rezulton se nga dokumentet, fitues duhet të jetë një kompani që zotëron kualifikimet e nevojshme teknike, kapacitetet organizative, makineritë, pajisjet, për të zbatuar kontratën, përvojën e duhur si dhe personelin e nevojshëm.

LEXO EDHE  Kandidati i LSI do të jetë në listat e PD vetëm në 1 qark, ja pse s´ranë dakort për Gjirokastrën e Dibrën

Normalisht, duke zbatuar koncesionin, ALEAT u duket më e besueshme zyrtarëve të Policisë së Shtetit, megjithëse ka lënë me dhjetëra herë, qindra mijëra qytetarë në radhë në postë apo në zyrat e aplikimit. Një tjetër arsye ka qenë xhiroja vjetore, ku kusht ishte që mesatarja e tre viteve për punë të jetë sa 30 % e fondit limit. Edhe këtë kriter, me koncesionin, e plotëson ALEAT!

Vijojmë më tej. Policia ka kërkuar kontrata të ngjashme të suksesshme të kryera gjatë 3 viteve të fundit në një vlerë jo më të vogël se 30 % e vlerës së përllogaritur të kontratës që prokurohet. Pra, me këtë pikë, të gjitha firmat automatikisht s’kualifikohen!

Kontratë të ngjashme vetëm ALEAT ka bërë. E suksesshme apo jo, për këtë s’mund të bëjë vlerësime Policia e Shtetit. Dhe në fund, e s’kualifikon, duke i shkaktuar shtetit një dëm prej rreth 100 mijë eurosh. Në këto kohë, ku institucionet e tjera shpallin fitues oferta disa milionë euro më të larta se oferta më e ulët, mund të tingëllojë pak e çuditshme “dëmi” prej 100 mijë eurosh.

Në një vend normal, edhe qindarka e fundit duhet të mbrohet dhe të shkojë atje ku ka nevojë shteti. Por, një gjë e tillë ka pak gjasa të ndodh në Shqipëri, ku shtetarët nxitojnë për të bërë tenderin e radhës, pasi jemi në muajt e fundit të pushtetit.