Presidenti Ilir Meta përmes një postimi në rrjetet sociale ka rrëzuar propagandën e Qeverisë dhe sukseset e Kryeministrit Edi Rama, duke nxjerrë në pah rritjen e madhe të kërkesave për azil ekonomik nga shqiptarët në vendet e BE.
Meta shkruan se sot një shqiptar ndihet më i pashpresë se një sirian, iraken dhe afgan.
Presidenti i ka bërë thirrje qytetarëve se është koha për menduar dhe vepruar, thirrje që vjen pak muaj para zgjedhjeve të përgjithshme të 25 prillit.
“Shqipëria zë vendin e parë në Europë për numrin e azilantëve ekonomikë, duke lënë pas edhe vende të sapodala nga lufta dhe konfliktet civile. Një shqiptar ndihet sot më i pashpresë se një sirian, iraken dhe afgan.
Lufta efikase kundër varfërisë, zhdukja e monopoleve, anulimi i koncensioneve korruptive, rritja e prekshme e pagave dhe pensioneve, hapja e vendeve të reja të punës, ulja e taksave, krijimi i shanseve dhe i mundësive të reja për të rinjtë e ndalojnë shpopullimin. Koha për të menduar dhe vepruar për shqiptarët”, shkruan Meta.
Reagimi i Presidentit vjen në një kohë kur nga Qeveria flitet për rritje ekonomike, kur Kryeministri përpiqet të justifikohet se shifrat e azilkërkuesve nga Shqipëria janë më të ulëta se emigrimet nga vende të ndryshme të Unionit drejt vendeve të tjera po në BE.
