Partia Republikanë, një nga aleatet besnike të Partisë Demokratike, përgjatë 30 viteve të pluralizmit shqiptar, ka vijuar me prezantimin e kandidatëve për deputetë për zgjedhjet e 25 Prillit.
Kreu republikan Fatmir Mediu ka paralajmëruar se nëse nuk do të ketë një marrëveshje me PD, atëherë PR do të dalë më vete në zgjedhje.
Duket se lëvizjet e Mediut janë një presion ndaj PD-së dhe kreut demokrat Lulzim Basha, pasi Republikanët nuk pranojnë që të kenë vetëm një kandidat në listat e sigurta të deputetëve për zgjedhjet e 25 prillit.
PD ka arritur marrëveshje me PAA e Agron Duka, LZHK e Dashamir Shehi, PDK e Nard Ndokas dhe PBDNJ-në e Vangjel Dules, ndërsa ende nuk ka një marrëveshje me PR dhe PDIU-në e drejtuar nga Shpëtim Idrizi.
Dy partitë kërkojnë më shumë se një kandidat në atë që konsiderohet si lista e sigurtë e emrave, kjo bazuar sipas tyre, në rezultatet zgjedhore të zgjedhjeve të mëparshme.
E ndërsa PDIU është në pritje të negociatave, Mediu ka nisur prezantimin e kandidatëve për deputet. Kështu pas Tiranës, ai ka prezantuar 16 kandidatët republikanë në Fier, duke çuar më tej presion ndaj demokratëve.
Madje edhe në fjalën e tij, Mediu ka folur për qëllimet që PR-ja ka.
Duke akuzuar kryeministrin Rama si shkaktar të gjendjes së vështirë ku ndodhet vendi, Mediu tha se kemi një përgjegjësi të madhe përballë fëmijëve tanë, të ardhmes së tyre, kemi përgjegjësi të madhe përballë prindërve tanë, për atë që ata kanë bërë për ne.
“Partia Republikane është partia që beson tek prona private, si themeli i ndërtimit të ekonomisë së një vendi.
Ka shumë sot që shtrojnë pyetjen;
Çfarë ka ndodhur ndërmjet nesh, Parti Republikane – Parti Demokratike?
A po bëjmë Pazar?
A po kërkojmë më shumë sesa na takojnë?
Unë dua marrëdhënie të Partisë Republikane me Partinë Demokratike, në mënyrë që gjithësecili nga ju, qytetar i thjeshtë, republikan e demokrat, të ketë vlerë në zgjedhje.
Politika jonë, regjimi i korruptuar që kemi përballë, manipulimi i vazhdueshëm i jetës sonë, manipulimi që Edi Rama do që t`i bëjë zgjedhjeve, kërkon që republikanë, demokratë, njerëz të ndershëm, të bashkohen në çdo qendër votimi, për të garantuar zgjedhje të lira dhe të ndershme.
Ne nuk mund t`a vëzhgojmë të keqen, ne duhet të përballemi me të keqen”, tha Mediu
