Procesi i vaksinimit po ecn me ritmin e breshkës. Kjo të paktën referuar shifrave zyrtare, ku në 6 ditët e para të vaksinimit kundër koronavirusit në Shqipëri dozën e kanë marrë 369 mjekë dhe infermierë, ndërsa në ditët në vijim, kryeministri Edi Rama, thotë se do të rrisim gradualisht ritmin.
“369 mjekë dhe infermierë të vijës së parë të betejës me COVID19 janë sot më të mbrojtur nga virusi i rrezikshëm, pas kryerjes së dozës së parë të vaksinës antiCOVID në Qendrën e Vaksinimit në Air Albania Stadium, në 6 ditët e para të vaksinimit, teksa procesi do të vijojë edhe sot, pa u ndalur.
Javë pas jave rrisim gradualisht ritmin sipas planit të vaksinimit”, shkruan Edi Rama, teksa postimin e shoqëron me pamjet nga procesi i vaksinimit në stadiumin “Air Albania”.
Nuk dihet pse procesi i vaksinimit po ecën me ritme të ngadalta, kur pavarësisht se u siguruan në mënyrë jo transparente 975 dozat e para të vaksinave janë përdorur pothuajse 1/3 e tyre.
Kryeministri ka shfrytëzuar këtë proces për show, ka hedhur akuza ndaj BE me pretendimin se lanë në mëshirën e fatit vendet jashtë Unionit, ndërkohë që Shqipëria nuk ka publikuar ende një plan vaksinimi edhe pse thuhet se mund të vaksinohen deri në 600 persona në ditë.
