Rroftë propaganda dhe vaksina! Poshtë qytetarët që kritikojnë ministrat!

Nga Boldnews.al

I ndodhur ngushtë nga haremi i Dubait, ku shfaqeshin dy ministrat e tij Arben Ahmetaj, Belinda Balluku dhe këshilltari Endri Fuga dhe numri dy i Bashkisë Tiranë Arbër Mazniku, pikërisht në kohën e përmbytjeve në vend, kryeministri Rama mendoi një zgjidhje për të shkëputur vëmendjen. Ku ka më mirë se vaksina anti-covid…

Janë 975 vaksina që do të injektohen për personelin shëndetësor të vijës së parë që përballet me Covid-19, në fakt 974, pasi njërën premtoi se do ta injektojë vetë kryeministri, sipas tij për të hequr çdo dyshim mbi efektshmërinë e saj.

Kreu i qeverisë sonë po bën rolin e atyre personave që në të shkuarën e largët provonin ushqimet e sulltanit apo mbretit për tu siguruar që nuk janë të helmuara.

Rama e hodhi helmin, një solucion i gatuar në “laboratorët” e kryeministrisë, e cila quhet propagandë. Disa vërtetë do e pësojnë, dhe efektet anësore janë të tilla që të krijon haluçinacione se jetën e ke nga kryeministri, që për këtë të mirë do t’i japësh votën dhe të bësh shtatë herë në ditë duva që ai dhe kabineti i tij të rrojnë sa malet, (por jo nga ato malet që rrafshohen nga guroret e Rilindjes).

Do të bësh duva edhe për Ahmetajn, Ballukun, Maznikun dhe Fugën që të kthehen shëndoshë e mirë nga Dubai dhe ai ushqim i ngrënë me byftekët e “artë” të kuzhinierit Nusret, tu kthehet në jetëgjatësi e forcë prej tigri.

Për të shuar këtë reagim qytetar që shfreu në rrjetet sociale, Rama pret orën 15.00 për të përveshur krahët dhe bërë veksinën anti-covid, sigurisht duke lëshuar disa batuta më kripë si ato të Duçes.

Kryeministri nuk e tregoi vendin që i ka dhuruar këto vaksina, si rrallëherë Rama mban sekrete, por u mjaftua vetëm me deklaratën se është një vend i Bashkimit Evropian.

“Nëse një vend e bën këtë për Shqipërinë, nuk dëshiron që 10 vende të tjera ti thonë bëjë dhe për ne. E bënë për Shqipërinë. Pse e bënë për Shqipërinë? Nuk më takon mua ta them, por një nga arsyet është se ‘keni Edi Ramën kryeministër”-tha plot mburrje.

LEXO EDHE  KPK jep vlerësim pozitiv, gjyqtarja Valbona Vata konfirmohet në detyrë

Dhe këtë kanë nisur ta bësojnë disa qytetarë që vaksinën po e sigurojmë edhe pse me pikatore pikërisht se kemi Ramën kryeministr. Për fatin e keq të tyrin shumë qytetarë kanë pësuar deformime të rënda në larjen dhe shpëlarjen e trurit në lavatriçen e Rilindjes, e cila u ka hequr shqisën e të menduarit.

Po çfarë duhet të besojmë, se jemi vendi pararojë në Ballkanin Perëndimor që siguroi një pjesë fare të vogël të vaksinës?

Faktet tregojnë se Serbia që nuk është pjesë e BE-së ka siguruar më shumë se 100 mijë vaksina prodhim të kompanisë Pfizer, Rama mburret sot me 984 injeksione të cilat para se të futen si trup i huaj në krahët e mjekëve dhe infermierëve të përzgjedhur do të duhet të kalojnë nga objektivët e kamerave propagandistike.

Disa zëra flasin se vaksina ka mbërritur si “dhuratë” nga Greqia, e cila hoqi ca teprica prej vetes për një interes më të madh siç është çështja e zgjerimit të detit dhe dhuratës që në trojet tona të vijojnë të ndërtohen memoriale dhe varreza të ushtarëve grek të rënë në Luftën e Dytë Botërore. Por kjo mbetet për tu parë, pasi edhe nëse me dozat e para nuk është kontribur i Greqisë, në të ardhmen ajo pritet të japë rreth 7000 vaksina për vendin tonë.

Haraçi dihet dhe askush nuk duhet të zgjasë krahun për vaksinë para se të fiksohet mirë nga mjetet propagandistike të qeverisë. Sot u “harrua” për disa çaste “darka e djejve” në Dubai, u harruan edhe ata mijëra qytetarë që gjenden nën ujin e përbytjeve. Rroftë propaganda dhe vaksina! Poshtë qytetarët që kritikojnë ministrat dhe oligarkinë!