Ambasadorja amerikane në Tiranë, Yuri Kim, iu drejtua me një apel qytetarëve shqiptarë, që të pajisen me karta ID, në mënyrë që të kenë të drejtën e votës në zgjedhjet e 25 prillit.
“Është shumë urgjente që të gjithë qytetarët shqiptarë të marrin kartat e reja të identifikimit, në mënyrë që të marrin shërbimet dhe të votojnë në zgjedhjet e 25 prillit.
Lëshimi i kartave të reja biometrike të identifikimit është pjesë thelbësore e marrëveshjes së 5 qershorit mbi reformën zgjedhore. Ju lutem, mos prisni derisa të jetë tepër vonë – merrni kartat tuaja të reja të identifikimit *tani* në mënyrë që të votoni në 25 prill”, thuhet në postimin e diplomates.
Postimi në fjalë është ri-postuar edhe nga Sekretari i Përgjithshëm i PD-së, Gazmend Bardhi, i cili në komentin e tij shprehet se “pajisja me ID është akt patriotik për të larguar nga Shqipëria virusin “Rama” që na ka shkatërruar ekonominë”.
“Identifikimi biometrik është i domosdoshëm. T’i japim shpresë vendit! Pajisuni me ID! Bëhuni pjesë e ndryshimit!”, shkruan Bardhi në komentin e tij.
