“Të bashkohemi për ndryshim, ose t´i dorëzohemi të keqes”. Kështu u shpreh kreu demokrat, Lulzim Basha, gjatë një takimi me studentë, duke iu referuar zgjedhjeve të 25 prillit, për të cilat tha se nuk do të jenë thjesht një rotacion i pushtetit, por ndryshimi për shqiptarët.
Basha tha se rinia është e bindur se ndryshimi është i mundur, ndërsa shtoi se ai dhe PD do të sjellin ndryshimin që presin të gjithë shqiptarët.
“Të bashkojmë energjitë rinore rreth këtij objektivi. Ndryshim do të thotë punësim për rininë, zhvillim ekonomik, të ardhura të larta”, tha Basha.
Sipas kreut demokrat, 25 prilli është ndarje bardh e zi, duke shtuar se synimi i kësaj qeverie, të mbetemi kështu si jemi.
“Vetëm pushteti aktual nuk e do ndryshimin. Rregjimi është kundër ndryshimit sepse nuk vuajnë ata, vuajnë qytetarët.
Kryeministri vetëm flet, dhe nuk ka asnjë vepër. Kurrë më e qartë nuk është zgjedhja ndërmjet ndryshimit dhe kolapsit.
Do të vazhdojmë këtu ku jemi, kështu siç jemi apo do ta ndryshojmë? Të jemi gjithë bashkë mund dhe do ta bëjmë realitet ndryshimin.
Resursi që kemi për të ndryshuar është një politikë në shërbim të njerëzve.
Investimi kryesor i Ramës, të zhbëjë besimin te politika si mjet ndryshimi. Propaganda e Ramës është se janë të gjithë njësoj ose nuk ka më mirë se ne.
Mundohet të shkatërroje mjetin e vetëm të demokracisë për ndryshim: një vizion i ri.
Ndryshimi nuk është thjesht ndërrim karrigesh, por ndryshim mendësie në qeverisje. Forca e vetme që mund të sjellë ndryshimin, një politikë shërbimi.
Efekti i parë i 25 Prillit është zhbllokimi i energjive pozitive nga pengmarrj”, tha Basha.
