Ministria e Shëndetësisë dhe Komiteti teknik i ekspertëve prej 9 muajsh trumpetojnë masat anti-Covid, ku ndër të tjera janë edhe mbajtja e maskës me detyrim në ambientet e hapura, distancimi social, ruajtja e higjenës vetjake.
Në kuadrin e masave gjithashtu ndalohen edhe tubimet apo takimet me më shumë se 10 vetë.
Çdo ditë policia njofton gjobitjen e qindra qytetarëve që kapen në rrugë pa maskë apo përtej asaj që konsiderohet ora policore.
Foto e mëposhtme tregon zv.ministren e Shëndetësisë, Mira Rakacolli, e cila kryeson grupin e ekspertëve apo Komitetin Teknik. Rakacolli shfaqet duke ecur në rrugë pa maskë. Ajo po ecën në një prej rrugëve të Tiranës, bashkë me një zonjë tjetër, ndërsa tërheq vëmendjen fakti se numri një i Komitetit Teknik nuk mban maskë, atë për të cilën trumpetohet prej muajsh.
Nuk dihet sepse Rakacolli nuk zbaton vendimin që trumpeton vetë, por duket se në rastin konkret shkon për shtat shprehja “mos bëni si bëj unë, por bëni si them unë”.
Praktikat në vende të ndryshme tregojnë se shumë zyrtarë, kur kanë shkelur masat anti-Covid janë dorëhequr ose janë penalizuar. Në rastin konkret nuk dihet nëse Rakacolli mund të penalizohet, ose mund të dorëhiqet.
