Kryeministri Edi Rama ka reaguar në lidhje me miratimin e dekretit nga autoritetet greke, sipas të cilit Greqia zgjeron kufirin detar me 12 milje në Jon.
Reagimi i Ramës ka ardhur pasi nga ish-Kryeministri Sali Berisha, kreu i PDIU-së, Shpëtim Idrizi apo nënkryetari i LSI-së, Petrit Vasili, zgjerim i kufirit detar në mënyrë të njëanshme nga Greqia, dhe heshtja e Qeverisë shqiptare, është një akt i pastër tradhëtie.
Kryeministri përmes një postimi në rrjetet sociale shkruan se pas rrëzimit të marrëveshjes famëkeqe të 2009 dhe mosmarrëveshjes që pasoi, ne kemi arritur më në fund dakordësinë me palën greke që delimitimin e kufirit tonë detar ta çojmë në Gjykatën Ndërkombëtare!
“Llumi nacional-folklorik i politikës shqiptare pa kufij, pa din e iman, është derdhur sërish në oqeanin digjital përmes shpifjes së madhe të “shitjes së detit” Greqisë! Këtë marrëzi ekstreme për përfitime politike mund ta besojnë vetëm ata që s’duan të dëgjojnë e as të kuptojnë!
Pas rrëzimit të marrëveshjes famëkeqe të 2009 dhe mosmarrëveshjes që pasoi, ne kemi arritur më në fund dakordësinë me palën greke që delimitimin e kufirit tonë detar ta çojmë në Gjykatën Ndërkombëtare! Shtrirja 12 milje e Greqisë në Jon s’ka lidhje me zonën joniane mes nesh!
E drejta e 12 miljeve ushtrohet aty ku është e mundur dhe jo aty ku s’ka mundësi, siç është rasti në zonën mes nesh ku vija ndarëse do të vendoset me gjyq! Greqia e ka ushtruar këtë të drejtë së fundmi, fiks siç e ka ushtruar Shqipëria qysh në vitin 1990! Të tjerat janë dokrra!”, shkruan Rama.
Në vijim ai thekson se “jetojmë në shekullin XXI dhe në mes të Europës,ku nuk mund të “shiten” e “blihen” dot dete e territore as fshehurazi, as haptazi nga asnjë autoritet i veçantë!
“Këto mund të ndodhin vetëm në batakun e ligësisë e të injorancës,ku llumi i shqiptarisë gjen shesh për përsheshin e tij”, shkruan Rama, ndërsa publikon edhe dokumentet e mëposhtme.
