Nga Boldnews.al
Prokuroria e Dibrës ka vendosur të pushojë hetimet për manipulim zgjedhor, për atë që njihet si “dosja 184”, me argumentin se vepra penale është parashkruar për shkak të zgjatjes së hetimeve.
Ky rezultat ishte mëse i pritshëm dhe kishte të paktën 3 vjet që po punohej në këtë drejtim.
Dosja “184” përfshinte brenda saj përgjime të zyrtarëve më të lartë qeveritarë në përpjekje për të manipuluar zgjedhjet e pjesshme lokale të Dibrës, të zhvilluara në vitin 2016.
Hetimet u zhvilluan për disa kohë nga ish- Prokuroria për Krime të Rënda, ku rezultonin të përfshirë biseda të kryeministrit Edi Rama, ish-ministrit të Brendshëm Saimir Tahiri, kreut të Komisionit të Ligjeve, Ulsi Manja dhe të tjerë personazhe të rangut të lartë, me drejtues lokalë në Dibër, ku diskutonin për sigurimin e votave në favor të Partisë Socialiste.
Dosja “184” ishte një nga “patatet e nxehta” të politikës shqiptare dhe qeveria e Edi Ramës bëri gjithçka për ta sabotuar.
Zgjidhja më e mirë ishte emërimi në krye të Prokurorisë së Përgjithshme i Arta Markut, nëpërmjet një procesi tërësisht anti-kushtetues dhe të njëanshëm.
Në realizimin e këtij projekti, direkt apo indirekt, u përfshinë edhe seli të rëndësishme diplomatike në Tiranë dhe misionet e tyre, të cilët mbështetin pa asnjë hezitim zgjedhjen e një Prokurori të Përgjithshëm vetëm me 69 votat e maxhorancës dhe në kundërshtim të hapur me ligjin themeltar shqiptar.
Në Dhjetor të vitit 2017, kur ish-Prokurorit të Përgjithshëm Adriatik Llalla i përfundoi mandati, maxhoranca socialiste nisi operacionin për zëvendësimin e tij me një njeri “të besuar”.
Procedura e ndjekur prej tyre ishte në kundërshtim flagrant me Kushtetutën. Legjislacioni në fuqi, i miratuar pas Reformës në Drejtësi, parashikonte që në rast se posti i Prokurorit të Përgjithshëm mbetej vakant, atëherë vendin e tij e zinte prokurori me vjetërsinë më të madhe në Prokurorinë e Përgjithshme, deri në zgjedhjen e Kryeprokurorit të ri.
Por, maxhorancës socialiste duket se nuk i pëlqente asnjë prej kandidatëve potencialë për të marrë përkohësisht atë detyrë. E, për këtë arsye, shpiku një procedurë parlamentare, për përzgjedhjen e një Prokurorit të Përgjithshëm të Përkohshëm.
Kjo iniciativë, tërësisht e pambështetur në ligj, u përkrah nga misionet e asistencës OPDAT e EURALIUS, të drejtuar politikisht nga Donald Lu e Romana Vlahutin, dy personazhe që ishin të vendosur të pranonin çdo zgjidhje, mjafton të sigurohej largimi i Llallës.
Me përkrahjen e OPDAT dhe EURALIUS, maxhoranca e Edi Ramës zgjodhi si Prokurore të Përgjithshme të Përkohshme Arta Markun, një ish-bashkëpunëtore e Ulsi Manjës.
Opozita PD-LSI e kundërshtoi këtë veprim të maxhorancës, duke e shoqëruar procedurën e zgjedhjes së Arta Markut në një ndër seancat më të zhurmshme të pluralizmit shqiptar.
Sipas opozitës, zgjedhja e Arta Markut po realizohej për të mbyllur dosjet ‘184” dhe “339”, dy hetime, në të cilat ishin konstatuar raste të bashkëpunimit të zyrtarëve socialistë me eksponentë të krimit të organizuar, për manipulime zgjedhore.
Dyshimet e opozitës u vërtetuan shumë shpejt. Donika Prela, e cila u emërua në mënyrë anti-ligjore në drejtimin e Krimeve të Rënda, bëri gjithçka që hetimet për dosjet “339” dhe “184” të zvarriteshin mjaftueshëm për të mbërritur në pikën e mos-hetimit.
Rreth një vit më parë, “ping-pongu” ndërmjet Krimeve të Rënda dhe prokurorisë së Dibrës me dosjen “184” u shndërrua në një situatë groteske.
Tashmë, kur kanë kaluar të gjithë afatet hetimore, Prokuroria e Dibrës, e cila e mbajti përfundimisht në dorë hetimin, konstatoi se, pavarësisht se ka pasur manipulim zgjedhor, nuk mund të merren nën përgjegjësi penale personat e përfshirë, pasi vepra penale është parashkruar.
Ky ishte një nga rezultatet më “spektakolare” të eksperimentit Rama-ambasadorial me Prokurorin e Përgjithshëm të Përkohshëm.
